UMTJHUMAYELI 11

₁Nawuthumela inzuzwakho phezu kwamanzi,

kungenzeka uyifumane godu

ngemva kwamalanga amanengi.

₂Ipahlakho ungayaba kalikhomba nanyana kabunane,

kodwana awuyazi ihlekelele engahle yehlele inarha.

₃Amafu nazele amanzi,

athululela izulu ephasini.

Nakube umuthi uzokuwela

ngesewula nanyana ngetlhagwini,

lapha uzokuwela ngakhona,

uzokulalela ngapho.

₄Ophika nommoya angeze atjala,

oqala amafu angeze avuna.

₅Njengombana ungazi ukungena komphefumulo

ehlwilini lesibeletho somfazi ozithweleko,

ngokunjalo angeze wawuzwisisa umsebenzi kaZimu,

owenza izinto zoke.

₆Tjala imbewakho ekuseni,

entambama izandla zakho zingaphumuli

ngombana awazi bona ngiyiphi ezakuphumulela,

kungaba ngile nanyana kube ngileya,

nanyana ziphumelele zombili.

₇Ukukhanya kumnandi,

kuhle emehlweni ukubona ilanga.

₈Nakube umuntu angaphila iminyaka eminengi,

akazithokozise ngayo yoke,

nokho akakhumbule imihla yobumnyama

kobana izakuba minengi.

Koke okusezako kulilize.

₉Jabula muntu omutjha ebutjheni bakho,

ihliziywakho ikuphe ukwenama

emalangeni wobutjha bakho.

Landela iimfiso zehliziywakho,

nalokho okubonwa mamehlwakho,

kodwana yazi bona kikho koke lokho

uZimu uzakugweba.

₁₀Yeke, tjhidisa isizi ehliziywenakho,

udlulise woke amahlungu emzimbenakho,

kodwana yazi bona ubutjha,

iye, ngitjho nobutjha ebuncanini bulilize.