1Nakube amadoda ayararana bese aya ebandla, umgwebi abange umlandwawo, akhuphe omsulwa, asole onomlandu 2bese indoda enomlandu leyo kumele irithwe, umgwebi uzayibhambalalisa phasi irithwe phambi kwakhe kube mivuvu ekhambisana nomlandwayo. 3Ingarithwa imivuvu ematjhumi amane, kodwana kungadluli lapho. Namritha ukudlula lapho umfowenu lo, uzakuhlaziseka emehlwenenu.
4Ungafaki ikomo isifonyo lokha nayibhula ibhali nekoroyi.
5Nakube abafo bahlala ndawonye bese omunye wabo uhlongakala anganandodana, umfazi wohlongakeleko angaphakeli umuntu ongasingowomndeni, okutjho iphandle. Kumele aphakele umfowabo lendodakhe, amthathe abe mkakhe, agcine isiko kuye njengomrharibakhe. 6Indodana elizibulo ezakubelethwa, izakuba ngeyomfowabo ohlongakeleko ukuze ibizo lakhe lingasuswa kwa-Israyeli. 7Nakube indoda leyo ayithandi ukungena umkamfowabo, umkamfowabo uzakukhuphukela kubaphathi esangweni afike athi: “Umrharibami kazi uyala ukuvusa ibizo lomfowabo kwa-Israyeli. Akafuni ukugcina isiko kimapha.” 8Abaphathi bedorobho bazambiza-ke bakhulume naye. Nakube uyaragalala athi: “Ngithi angimfuni!”
9Khona-ke umkamfowabo loyo uzakuya kuye phambi kwabaphathi afese amhlubulise ipatlagwana, amkhafulele ebusweni athi kuye: “Kuzakuba njalo endodeni engafuni ukuvusa umuzi womfowabo.” 10Umndenakhe uzakwaziwa kwa-Israyeli bona ngowaHlutjuliswa iPatlagwana.
11Nakube amadoda ayalwa bese umfazi wendodenye atjhidele bona alamulele indodakwakhe ebhudungelweko, atjhubelele indoda leyo ngepahlayo yangaphasi, 12nizakuqunta isandla somfazi loyo, ilihlo lenu lingamtlhuweli.
13Ningabi nemihlobo emibili yamatje wokulinganisa, amakhulu namancani, ngeembadeni zenu. 14Ningabi namathungana amabili wokulinganisa, amakhulu namancani, ngeenkumbeni zenu. 15Yibani nesilinganiso sinye seqiniso, okulilitje nethungana ukuze amalangenu ande enarheni uSomnini uZimenu aninikela yona. 16Iye, uSomnini uZimenu uyabanyenya boke abenza izinto ezinjalo, okutjho abarhweba ngekohliso.
17Khumbulani enakwenziwa ngu-Amalekhi naniphuma eGibhide: 18Kwathi lokha nanidiniweko begodu niphelelwe mamandla wanisahlela endleleni. Warhayila boke ebebasemuva, wangesaba uZimu. 19Ngalokho emva kobana uSomnini uZimenu aninikele ukuphumula ezitheni zenu zoke, enarheni uSomnini uZimenu aninikela yona bona ibe lilifa lenu, susani zoke iinkhumbuzo zaka-Amalekhi ngaphasi komthunzi welanga. Ningakhohlwa.
