UDANYELA 2

₁Emnyakeni wesibili wokubusa kwakaNebukadinetsari, waba nebhudango bewadungeka emmoyeni kangangobana akhange asaba nobuthongo. ₂Nje-ke ikosi yayala bona kubizwe abosomlingo, abaloyi nezanusi kanye nezazi zamaKasidi kobana beze bazokuhlathululela ikosi ibhudango layo lelo. Kuthe bona bafike phambi kwayo, ₃yathi kibo: “Ngibenebhudango elingihlubayezako, nje-ke ngifuna ukulazi kobana litjho ukuthini.” ₄Nje-ke izazi zamaKasidi zakhuluma nekosi ngesi-Aramu zathi: “Ikosi ayiphile siphile! Ngalokho ikosi ingatjela iinceku zayo ibhudango, zona zizalihlathulula.” ₅Ikosi yaphendula izazi zamaKasidi yathi: “Kwamambala ngiqinisile: Nakube nihluleka ukungazisa ibhudango nehlathululwalo, nizokuhlahlelwa iinquqwana nemizenu izokwenziwa amarubhi. ₆Kodwana naningitjela ibhudango nehlathululwalo, ngizonamukelisa izipho nemivuzo kanye nokuhlonitjhwa okukhulu. Yeke, ngitjelani-ke ibhudango nehlathululwalo.” ₇Zona zayiphendula kwesibili zathi: “Ikosi ayitjele iinceku zayo ibhudango mantange, nje-ke thina sizakutjho ihlathululwalo.” ₈Ikosi yaziphendula yathi: “Ngambala ngiyazi bonyana nizama ukuzenzela isikhathi ngombana niyabona bona bengiqinisile ngequnto lami: ₉Nangabe aningitjeli ibhudango, sinye isigwebo senu. Ngalokho nilumbe amaqhinga ngomnqopho wokukhuluma amala nekohliso phambi kwami ngokucabanga bona ubujamo buzakuphenduka. Yeke, nina ngitjelani ibhudango, mina-ke ngizakwazi bonyana ningalihlathulula.”

₁₀Izazi zamaKasidi zaphendula phambi kwekosi zathi: “Ephasinapha, akakho noyedwa ongakghona ukwenza lokho okufunwa yikosi. Kwakhona azange khekube nekosi, nanyana kuthiwa yikulu begodu inamandla kangangani eyakhe yabuza into enjalo kibosomlingo, kubabhuli namkha ezazini zamaKasidi. ₁₁Into ebuzwa yikosi le, inzima; akakho ongayembula ekosini ngaphandle kwabozinyana begodu bona abahlali hlangana nabantu.”

₁₂Ngebanga lendaba leyo, ikosi yasilingeka beyafutheka kangangobana yayala kobana zoke iinhlakaniphi zeBhabheli zibhujiswe. ₁₃Nje-ke kwakhutjhwa isimemezelo kobana iinhlakaniphezo zibhujiswe. Godu kwafunwa noDanyela nabangani bakhe kobana nabo babulawe. ₁₄Kwathi lokha u-Ariyoki, umphathi wobuzimba naphumako bona ayokubhubhisa iinhlakaniphezo, uDanyela wakhuluma naye ngobuhlakani nangamaqhinga. ₁₅Wathi ku-Ariyoki, godu ogade ayinduna yesigodlo: “Kanti kubayini isimemezelo sekosi sinesihluku kangaka?” Nje-ke u-Ariyoki wahlathululela uDanyela koke. ₁₆Ngalokho uDanyela wangena ekosini wazibawela isikhatjhana kobana azokwazi ukuyihlathululela ibhudango.

₁₇Nje-ke uDanyela waya lapha ahlala khona wafese wabika indaba leyo kuRhananiya, uMitjhayeli no-Azariya abangani bakhe, ₁₈wabatjela kobana babawe umusa kaZimu wezulwini mayelana nefihlakalo le ukuze bangabhujiswa yena nabangani bakhe kanye nezinye iinhlakaniphi zeBhabheli. ₁₉Nje-ke kwathi ebusuku, ifihlakalo yembuleka kuDanyela ngombono. Ngalokho uDanyela wadumisa uZimu wezulwini.

₂₀Wathi:

₂₄UDanyela waya ku-Ariyoki obegade abekwe yikosi kobana abhubhise iinhlakaniphi zeBhabheli, wafese wathi kuye: “Ungazibhubhisi iinhlakaniphi zeBhabheli. Wena ngithatha nje ungise ekosini, mina ngizakulethela ikosi ihlathululo.”

₂₅Nje-ke masinyana u-Ariyoki wasa uDanyela phambi kwekosi, wafese wathi kiyo: “Hlangana nabathunjwa bakwaJuda, ngifunyene umuntu ongatjela ikosi ihlathululo.” ₂₆Ikosi yabuza uDanyela obesele aziwa bona nguBhelithetjhatsari, yathi: “Ungakghona ukungitjela ibhudango engilibhudangileko nehlathululwalo na?” ₂₇UDanyela waphendula wathi: “Lokho ikosi ebuze ngakho, akukho iinhlakaniphi, ababhuli, abosomlingo namkha izanusi ezingakwembula ekosini. ₂₈Kodwana kukhona uZimu ezulwini owembula iimfihlakalo begodu yena wembulile ekosinami uNebukadinetsari kobana kuzokwenzekani emalangeni ezako. Nje-ke ibhudango nombono owedlule engqondweni yekosi isalele, ngilokhu: ₂₉Kuthe ikosi isalele emkghadinayo, yafikelwa mbono walokho okuzokwenzeka ukusukela njesi, nomembuli weemfihlakalo wavezela ikosi bonyana kuzokwenzekani. ₃₀Nje-ke nakungimi, ifihlakalo le yembulwe kimi ingasi ngombana ngihlakaniphe ukwedlula abanye abantu, kodwana kube ngehloso yokobana ikosi yaziswe ihlathululo nokobana izwisise imizindlo yemicabangwayo.

₃₁“Kosi, angitjho wathi usaqalile, wabona isithombesibunjwa esikhulu! Isithombeso besisikhulu kwamanikelela nokuphazimula kwaso bekurara. Sona besijame phambi kwakho sinesibumbeko esesabekako. ₃₂Isithombesibunjweso besinehloko yegolidembala; isifuba nemikhonwaso kulisiliva, amadinaso neenyonga kulikoporo, ₃₃imilenze neenyawo zaso kuyisimbi nomdaka otjhisiweko. ₃₄Uthe usaqalile njalo, kwaqephuka ilitje entabeni kungasi ngesandla somuntu, lafese latshidlha isithombesibunjweso eenyaweni eziyisimbi kanye nomdaka lazephula iinquqwana. ₃₅Nje-ke isimbi, umdaka, ikoporo, isiliva kanye negolide kwaba ziinquqwana njengomungu eselelweni nawuphephethwa mumoya ehlobo: Akukho nokukodwa kweenquqwanezo okwafunyanwako. Kodwana ilitje elatshidlha isithombesibunjweso laphenduka idwala elikhulu lazala iphasi loke.

₃₆“Bekungilelo-ke ibhudango. Kwanjesi sizokuhlathululela ikosi bona litjho ukuthini. ₃₇Wena kosi, kosi yamakhosi, wena onikelwe nguZimu wezulwini umbuso, amandla, iinkhwepha nobukhosi, ₃₈wabeka esandleni sakho abantu abaphila nanyana kuphi, iimbandana zommango, iinyoni zesibhakabhaka; iye wena owajanyiswa bona ulawule ngaphezu kwakho koke lokho, wena uyihloko yegolidelo. ₃₉Emva kwakho kuzakuvuka omunye umbuso omncani kunewakho, godu bekube nowesithathu wekoporo, ozakubusa iphasi loke. ₄₀Kuzakuba khona umbuso wesine ozakuba ngoqine njengesimbi. Iye, njengesimbi etshidlhako, ngaleyondlela uzakurhayila ugaye yoke eminye imibuso. ₄₁Njengombana ubone iinyawo namazwani ebekanengcenye emdaka wombumbi nesimbi, lokho kuzakuba mbuso ohlukeneko: Ukuqina kwesimbi kuzakuba kiwo. Njengombana ubone isimbi ihlanganiswe nomdaka, ₄₂iye, ingcenye yamazwani bekuyisimbi nengcenye imdaka, ngendlela enjalo ingcenye yombuso lowo izakuba ngeqinileko, enye ibe ngebuthakathaka. ₄₃Njengalokhu ubonile isimbi ivangene nomdaka, ngendlela enjalo abantu bazakuhlangana ngokwendiselana, kodwana angekhe babemunye njengombana nesimbi ayibumbani nomdaka. ₄₄Khona emalangeni wamakhosi lawo, uZimu wezulwini uzakujamisa umbuso ongasoze wapheliswa namkha udluliselwe kabanye abantu. Uzakutshidlha bewuphelise yoke imibuso eminye, kodwana wona uzakujama nini nanini. ₄₅Kuzakuba njengombana ubone ilitje liqephuka entabeni kungasi ngesandla somuntu, latshidlha isimbi, ikoporo, umdaka, isiliva kanye negolide iinquqwana. Ngambala, uZimu omkhulu wazise ikosami lokho okuzakwenzeka emva kwalokhu. Ibhudango liqinise kwamambala nehlathululwalo ithembekile.”

₄₆Nje-ke, ikosi uNebukadinetsari yawa ngobuso phambi kwakaDanyela yamlotjha, beyayala kobana kunikelwe kuye umnikelo weenthoro newetjhwalo ₄₇begodu yathi kuDanyela: “Mbala, uZimenu unguZimu ongaphezu kwabozinyana, iye, uyiKosi yamakhosi nomembuli weemfihlakalo, ngalokho ukghonile ukungivezela ifihlakalo.” ₄₈Nje-ke ikosi yaphakamisa uDanyela yamupha nezipho ezihle khulu. Yambeka umbusi ngaphezu kwesifunda soke seBhabheli beyamenza umphathi weenhlakaniphi zakhona. ₄₉Ngesibawo sakaDanyela ikosi yabeka uTjhedreke, uMitjhaka no-Abhedinigo njengabalawuli besifunda seBhabheli. UDanyela yena wahlala ngesigodlweni sekosi.