UThimothi ukhamba noPowula noSilasi
1UPowula wafika eDerbe neListra, lapha bekuhlala khona umfundi ekuthiwa nguThimothi; unina amJuda okholiweko, kodwana uyise amGirigi. 2Abazalwana beListra ne-Ikhoniyo bebambuka. 3UPowula bekafuna ukuthatha uThimothi akhambe naye, yeke wamsokisa ngebanga lamaJuda ahlala endaweni leyo ngombana boke bebasazi bona uyise liGirigi. 4Lokha nabalokhu bakhamba umuzi nomuzi bebanande bakhuluma bona kufuze kulondwe iimphetho ezathathwa bapostoli nabaphathi eJerusalema. 5Yeke amabandla aqiniswa ekukholweni akhula malanga woke.
UPowula uya eMasedoniya
6UPowula noThimothi badabula isifunda seFrigiya neGalatiya, ngombana uMoya oCwengileko wabakhandela ukutjhumayela e-Asiya. 7Kuthe bona bafike emkhawulweni weMusiya, balinga ukuya endaweni yeBhithiniya, kodwana nalapho uMoya wakaJesu akhange abavumele. 8Alo-ke bakhamba badabula eMusiya behlela eTrowasi.
9Phakathi kobusuku uPowula waba nombono wendoda yeMasedoniya egade ijamile imncenga ithi: “Akhese uze eMasedoniya hle, uzosisiza!” 10Kuthe bona uPowula abone umbono lo, sazilungiselela msinyana ukuya eMasedoniya, sikholwa bona uZimu usibizele ukuyokutjhumayela ivangeli kibo.
Ukutjhuguluka kwakaLidiya
11Sasuka eTrowasi ngomkhumbi sathayela poro eSamothirake, ngelanga elilandelako saya eNeyapoli. 12Kusuka lapho saya eFilipi okulidorobho eliqakathekileko esifundeneso seMasedoniya eliphasi kombuso weRoma. Sahlala amalangana edorobheneli. 13Ngelanga leSabatha saphumela ngaphandle kwesango ledorobho saya ngemlanjeni, lapha besilindele ukufunyana khona indawo yokuthandaza. Sahlala phasi sakhuluma nabafazi egade bahlangene lapho. 14Omunye wabagade balalele bekungumma obizwa bona nguLidiya, amthengisi wezambatho ezibubende edorobheni leThiyathira. Gade alotjha uZimu; nje uZimu wavula ihliziywakhe bona ilalelisise lokho uPowula akutjhoko. 15Kuthe bona yena nomndenakhe babhajadiswe, wasimemela endlinakhe wathi: “Naningithatha njengomuntu okholwa yiKosi, yizani nizokuhlala kwami.” Yeke wasitomatomela bona sihlale.
Ngesikhungweni eFilipi
16Langelinye nasiya endaweni yokuthandaza, sahlangatjezwa likhobokakazi ebelinommoya wobungoma. Belenzela abaninilo imali enengi ngokubhula kwalo. 17Lalandela uPowula nathi, lirhuwelela lithi: “Amadoda la aziinsebenzi zakaZimu ongoPhezulu; banibikela indlela yokusindiswa!” 18Lakwenza lokhu amalanga amanengi, kufikela lapho uPowula wabe wanyenya khona waphendukela kilo, wathi emmoyeni: “Ebizweni lakaJesu Krestu ngiyakuyala bona uphume kuye!” Khonokho ummoya wobungoma waphuma kuye.
19Kuthe bona abaninilo babone bona ithuba lokwenza imali ngalo alisekho, babamba uPowula noSilasi babadosela etatawini kobana baqalane nabomthetho. 20Babaletha phambi kwabagwebi bathi: “Amadoda la amaJuda, begodu abanga ihlangahlangano edorobheni lekhethu 21ngokufundisa amasiko aphikisana nomthetho wethu thina esimaRoma bona siyamukele besiyenze.”
22Isiqubuthu saba semdibini wokusahlela uPowula noSilasi; abagwebi bayala bona bahlutjuliswe bebarithwe. 23Ngemva kokudulwa kabuhlungu badlhunywa ngesikhungweni, kwathiwa umphathisikhungo ababeke ilihlo elibukhali. 24Ngemva kokwamukela umyalo lo, umphathisikhungo wabadlhunya ngesikhungweni esingaphakathi, wabopha iinyawo zabo hlangana neengaqa ezibudisi zeengodo.
25Phakathi kobusuku uPowula noSilasi bebathandaza bavuma iingoma badumisa uZimu, ezinye iimbotjhwa zibalalele. 26Khonokho kwaba khona ukusikinyeka okukhulu kwephasi kangangobana kwadengezela iinsekelo zesikhungo. Khonapho zoke iimvalo zesikhungo zavuleka, iimbopho zatjhaphuluka kizo zoke iimbotjhwa. 27Umphathisikhungo wavuka, kwathi bona abone iimvalo zesikhungo zivulekile, warhwatjha isabulakhe wafuna ukuzibulala ngombana wadlumbana bona zoke iimbotjhwa zibalekile. 28Kodwana uPowula warhuwelela wathi: “Ungazikhubazi ngombana soke sisesekhona.”
29Umphathisikhungo wathi akukhanyiswe, wangena agijima waguqa phambi kweenyawo zakaPowula noSilasi aqhaqhazela.
30Nje-ke waya nabo ngaphandle wababuza wathi: “Banimzana, kufuze ngenzeni ukuze ngisindiswe na?”
31Baphendula bathi: “Kholwa eKosini uJesu, nje-ke uzakusindiswa wena nomndenakho.” 32Yeke batjhumayela ilizwi leKosi kuye nakibo boke ebebasendlinakhe. 33Ngalo i-awara lobusukwelo umphathisikhungo wabathatha wabahlambisa amanceba; nje-ke kwathi khonokho yena nawo woke umndenakhe babhajadiswa.
34Sekabangenise ngendlinakhe, wabapha ukudla. Yena nomndenakhe bebanethabo ngombana gade sebakholwe kuZimu.
35Ngelanga elilandelako ngamasa abagwebi bathumela amapholisa kumphathisikhungo nomyalo othi: “Thukululani amadoda lawo.”
36Yeke umphathisikhungo watjela uPowula wathi: “Iinkhulu zinithumele umlayezo bona sinithukulule. Yeke phumani nikhambe ngokuthula.”
37Kodwana uPowula wathi emapholiseni: “Basibetha phambi kwabantu ngaphandle kokusigweba, basidlhunya ngesikhungweni, thina esizizakhamuzi zombuso weRoma. Manjesi bafuna ukusibuyisela emva ngasese na? Awa! Iinkhulu azize ngokwazo kobana zizosikhupha.”
38Amapholisa athula amezwi la eenkhulwini. Kwathi bona zizwe bonyana uPowula noSilasi bebazizakhamuzi zombuso weRoma, zesaba. 39Zeza kibo zazokuncancabeza. Zabakhupha ngesikhungweni, zababawa bona bakhambe edorobheni. 40Emva kobana uPowula noSilasi baphume ngesikhungweni, baya endlini kaLidiya, lapha bahlangana khona nabazalwana. Kuthe sebabakhuthazile, bakhamba.
