UPitrosi noKorneliyasi
1EKhesariya bekukhona indoda, ibizo layo linguKorneliyasi umphathimabutho ebekuthiwa mabutho weTariyana. 2Yena nomndenakhe bekubabantu abesaba uZimu nabazinikeleko kuye. Gade abela abadududu, ahlala njalo athandaza uZimu. 3Kwathi langelinye ngesimbi yesithathu malangantambama waba nombono. Ngokucacileko wabona ingilozi kaZimu ifika kuye isithi: “Korneliyasi!” 4Yena wayiqala ngokuyesaba, wabuza wathi: “Kosi, kwenze njani?” Ingilozi yaphendula yathi: “Imithandazwakho nokwabela kwakho abadududu kwenyukele kuZimu njengesikhumbuzo. 5Nje-ke, thumela amadoda eJopa ayokubiza uSimoni ekuthiwa nguPitrosi. 6Yena uhlala kwaSimoni umtjhukiinkhumba onendlu hlanu kwelwandle.”
7Kwathi lokha ingilozi egade ikhuluma naye nasele ikhambile, uKorneliyasi wabiza iinsebenzi zakhe ezimbili nejoni elesaba uZimu egade limelusa. 8Wabatjela koke ekwenzekileko bewabathuma eJopa.
9Ngakusasa basesesendleleni, sele batjhidele edorobheni, uPitrosi wenyukela phezu kwephahla lekumba wayokuthandaza kusemini ekulu. 10Walamba bewakhanuka kobana angadla. Nje-ke kwathi ukudla kusalungiswa waba semmoyeni. 11Wabona izulu livuleka, kwaba nento eyehlako injengetjhila elikhulu lehliselwa phasi ngeentsutsungu zalo zozine. 12Ngaphakathi kwalo bekukhona imihlobohlobo yazo zoke iimbandana ezineenyawo ezine, iimphili ezikhakhabako neenyoni zomkayi. 13Nje-ke ilizwi lathi kuye: “Pitrosi, vuka, uhlabe, ugome!”
14Kodwana uPitrosi wathi: “Awa, Kosi ngombana azange khengigome okusilapheleko namkha okungakahlambuluki.”
15Ilizwi lakhuluma naye godu, lathi: “Lokho uZimu akuhlambululileko ungakubizi bona kusilaphele.” 16Lokho kwenzeka amahlandla amathathu, yeke itjhilelo lathathwa khonokho labuyiselwa ezulwini.
17UPitrosi asararekile bona umbono utjho ukuthini, amadoda athunywe nguKorneliyasi sele afunyene indlu kaSimoni bona ikuphi, ajama esangweni layo. 18Arhuwelela, abuza bona kungabe ukhona umyeni lapha, ibizo lakhe elinguSimoni Pitrosi na?
19Kuthe uPitrosi asazindla ngombono lowo, uMoya oCwengileko wathi kuye: “Qala, kunamadoda amathathu afuna ukukubona! 20Sikima, wehle uye kiwo! Ungazazi ukukhamba nawo ngombana athunyelwe ngimi.”
21Yeke uPitrosi wehla waya kiwo, wafika wathi: “Nginguye enimfunako. Alo, nize ngani?” 22Aphendula athi: “Umphathimabutho, uKorneliyasi usithumile. Uyindoda eqotho eyesaba uZimu begodu ukhulunywa kuhle esizweni soke samaJuda. Uyalwe yingilozi ecwengileko bona akumemele emzinakhe ukuze ezwe bonyana umphathele ndaba bani.”
23UPitrosi wawabawa bona angene ngendlini; wahlala nawo ubusukobo. Ngakusasa wakhamba nawo; nabanye abazalwana beJopa bakhamba naye. 24Ngelanga elilandelako wafika eKhesariya, lapha uKorneliyasi gade abalindele khona begodu gade ameme iinhlobo nabangani bakhe abakhulu. 25UPitrosi asangena endlini, uKorneliyasi wamhlangabeza wahloma ihloko phasi eenyaweni zakhe ngokumhlonipha. 26Kodwana uPitrosi wamphakamisa wathi kuye: “Sikima, nami ngimumuntu nje.”
27Asakhuluma naye njalo, wangena ngendlini, wafumana kuhlangene abantu abanengi. 28Wathi kibo: “Nani ngokwenu niyazi bona kuphambene nomthetho wethu kobana umJuda ahlanganyele namkha athekele wesinye isizwe. Kodwana uZimu ungibonisile bona ngingathi umuntu othileko usilaphele namkha akakahlambuluki. 29Nje-ke kungalokho kuthe nangibizwako ngeza ngaphandle kokuzaza. Alo-ke, ngingabuza bona kubayini ningibizile na?”
30UKorneliyasi waphendula wathi: “Amalanga amane adlulileko, bengithandaza ngingendlinami ngesikhathesi, ngesimbi yesithathu malangantambama: Khonokho kwajama phambi kwami indoda yembethe izambatho eziphazimako. 31Yathi kimi, ‘Korneliyasi! UZimu uwuzwile umthandazwakho bewakhumbula nokwabela kwakho izipho kwabadududu. 32Nje-ke, thumela eJopa, uyokubiza uSimoni ekuthiwa nguPitrosi. Yena umyeni emzini kaSimoni umtjhukiinkhumba, ohlala hlanu kwelwandle.’ 33Yeke ngathumela bona bayokubiza msinyana; wenze kuhle wafika. Soke sesilapha phambi koZimu, sesilindele ukuzwa koke uZimu akuyale bona usitjele khona.”
Ikulumo kaPitrosi
34UPitrosi wathoma ukukhuluma, wathi: “Sekuyangikhanyela bona uZimu akakhethi ubuso. 35Kodwana omesabako enze okulungileko nanyana angewasiphi isizwe uyamukeleka kuye. 36Niyawazi umlayezo uZimu awuthumela ebantwini bakwa-Israyeli, akhuluma ivangeli lokuthula eliza ngoJesu Krestu oyiKosi yabo boke. 37Niyakwazi bona kwenzekeni kilo loke iJudiya, kusukela eGalile ngemva kombhabhadiso owatjhunyayelwa nguJwanisi; 38kobana uZimu wajamisa uJesu weNazaretha ngoMoya oCwengileko namandla, wakhamba yoke indawo enza okuhle, apholisa boke egade bangaphasi kwamandla kaSathana ngombana uZimu gade anaye. 39Sibofakazi bakho koke akwenzileko elizweni lamaJuda neJerusalema. Bambulala ngokumphanyeka esiphambanweni, 40kodwana uZimu wamvusa kabafileko ngelanga lesithathu, wenza bona abonwe, 41ingasingibo boke abantu, kodwana abonwe ngithi uZimu asikhetha njengabofakazi. Iye, thina esadla besasela naye emva kokuvuka kwakhe kabafileko. 42Wasiyala bona sitjhumayele ebantwini besifakaze bona nguye uZimu amkhethileko bona abe mgwebi wabaphilako nabafileko. 43Boke abaphorofidi bafakaza ngaye bona woke okholwa kuye wamukeliswa ukulitjalelwa kwezono ngebizo lakhe.”
Abantu abatjhili baphiwa uMoya oCwengileko
44Kwathi uPitrosi asakhuluma amezwi la, uMoya oCwengileko wehlela phezu kwabo boke egade balalele umlayezo. 45Amakholwa asokiweko nebegade eze noPitrosi, arareka khulu ngombana isipho sakaMoya oCwengileko besithelwe naphezu kwabatjhili. 46Babezwa bakhuluma ngeenlimi ezitjhili badumisa uZimu.
Nje-ke uPitrosi wathi: 47“Ukhona ongakhandela bona abantwaba babhajadiswe ngamanzi na? Nabo bamukele uMoya oCwengileko njengathi.” 48Yeke wathi ababhajadiswe ebizweni lakaJesu Krestu. Bambawa bona ahlale nabo amalangana.
