2 UTHIMOTHI 3

₁Yazi lokhu bona ngemihla yokuphela kuzokufika iinkhathi ezibudisi kwamambala. ₂Abantu bazakuba ngabazithandako, abathanda imali, abazikhukhumezako, abazigqajako, abahlambalazako, abangalaleli ababelethi, abangathokoziko, abangakahlanzeki, ₃abanganathando, abangavumi ukubuyisana, abahlebako, abangazigobiko, abakhohlakeleko, abahloye okuhle, ₄abakhaphelako, abawalazelako, abazitjhayako, abathanda injabulo kunobanyana bathande uZimu; ₅banesimilo sokwesaba uZimu khisibe baphika amandla wakhona. Abanjalo ubaphephe. ₆Kilabo kunabakhukhutha bangene izindlu bafike bathumbe besifazana abanyariyako, abadiselwa zizono zabo nabaphethwe ziinkanuko ezahlukeneko; ₇bahlala bafundiswa, kodwana abafiki ekulazini iqiniso. ₈NjengoJanesi noJambresi bajamelana noMosi, ngokunjalo nalabo bajamelene neqiniso; kubabantu abanemikhumbulo eyonakeleko, bahlulekile ekukholweni. ₉Kodwana angeze bathuthuka ngombana njengendabeni yamadoda amabili la, ubudlhayela babo buzakuba setjhatjhalazini kibo boke.

₁₀Nje-ke wena wayilandela ifundiswami, ukuziphatha kwami, ihloswami yepilo, ukukholwa kwami, ukunyamezela kwami, ithando lami, ukuqinisela kwami, ₁₁ukuzunywa nokutshwenywa okwangehlela e-Anthiyorhiya, e-Ikhoniyo neListra. Ukuzunywa okunje ngakunyamezelela begodu iKosi yangihlenga kikho koke lokhu. ₁₂Mbala, boke abathanda ukuphila ipilo emsulwa kuKrestu Jesu bazakuzunywa. ₁₃Kodwana iinkhohlakali nabakhohlisi bazakuragela phambili ebumbini, badukisa nabo badukiswa. ₁₄Kodwana wena kakarela kilokho okufundileko nakilokho onesiqiniseko ngakho, ukwazi bona ukufunde kubani. ₁₅Kwebuntwaneni wayazi imitlolo ecwengileko enamandla yokukupha ukuhlakanipha kube kusindiswa ngokukholwa kuKrestu Jesu. ₁₆Yoke imitlolo iphefumulelwe nguZimu, begodu ilungele ukufundisa, ukukhalima, ukunqophisa imitjhapho nokuyala ekulungeni, ₁₇khona umuntu kaZimu azakufanela bona abe ngolungele ukwenza yoke imisebenzi emihle.