2 KWEBETHESALONIKA 3

₁Kokugcina bazalwana, sithandazelani ukuze ilizwi leKosi lirhatjheke ngamandla, iKosi idunyiswe kizo zoke iindawo njengombana kunjalo phakathi kwenu. ₂Iye, nisithandazele bona siphephe ebantwini abakhohlakeleko nabambi ngombana akusibo boke abanokukholwa.

₃Kodwana iKosi ithembekile, izanipha amandla beyiniphephise komumbi. ₄Nje-ke sinethemba eKosini ngani, kobana izinto esanifundisa zona niyazenza begodu nizokuragela phambili ngokuzenza.

₅Sengathi iKosi inganqophisa iinhliziyo zenu ethandweni lakaZimu, nekunyamezeleni kwakaKrestu.

₆Nje-ke siyaniyala bazalwana ebizweni leKosethu uJesu Krestu bona niwagegede amakholwa aphila ngokubherelela, ingasi ngokweemfundiso abazifunyene kithi ₇ngombana nani niyazi bonyana nifanele ukulingisa thina; azange sibherelele lokha nabe siphakathi kwenu. ₈Akakho noyedwa esakhe sagoma isikwa sakhe simahla, kodwana besisebenza sijuluka ubusuku nemini ukuze singabi mthwalo kini. ₉Akutjho bona besinganamalungelo wokunidisibeza, kodwana besifuna ukuninikela isibonelo ekumele nisilandele. ₁₀Ngitjho nalokha nasisesenani, saninikela umyalo lo othi: “Nakube umuntu akafuni ukusebenza, khona-ke akangagomi.”

₁₁Sizwile bonyana abanye benu baphila ngobuvila, bayehla bayenyuka, bazidlhunya eendabeni zabanye. ₁₂Yeke abantu abanjalo siyabayala besiyabancenga eKosini uJesu Krestu bonyana abenze umsebenzabo kuhle, basebenzele isikwa sabo.

₁₃Bazalwana, ningadinwa kukwenza okulungileko. ₁₄Qaphelani labo abangalaleli esikutjho ngencwadini le, ningahlanganyeli nabo khona bazakuba neenhloni. ₁₅Nokho ningabaphathi njengezitha kodwana bayeleliseni njengamakholwa.

₁₆Nje-ke sengathi iKosi yokuthula ngokwayo inganipha ukuthula ngeenkhathi zoke nangazo zoke iindlela. IKosi ayibe nani noke.

₁₇Ngimi uPowula, ngesandla sami otlole isilayeliso lesi. Leli litshwayo lazo zoke iincwadi zami, yindlela engitlola ngayo.

₁₈Sengathi umusa weKosethu uJesu Krestu ungaba nani noke.