2 USAMYELA 8

₁Kwathi emva kwalokho uDavida wamadlha amaFilista; wawalawula ngokuwathathela iintambo zokubusa ezandleni zawo. ₂Waragela phambili wamadlha nebakwaMowabi. Wabalalisa umjeje phasi ehlabathini wabalinganisa ngentambo. Boke abalinganiseka ngobude bentambo kabili bebabulawa bese kuthi abalinganiseke kanye baliswe. Yeke amaMowabi asebenzela uDavida abe aletha nemithelo kuye.

₃Ngaphezu kwalokho uDavida wamadlha noHadadi-Ezeri umsa kaRerhobi ikosi yeTsoba lokha uHadadi-Ezeri nasathi ubuyisa amandlakhe wokulawula iindawo ezimagegana nomlambo iYufrathe. ₄UDavida wathumba kuHadadi-Ezeri amajoni weenyawo aziinkulungwana ezimatjhumi amabili nabakhweli abayikulungwana namakhulu alikhomba. Wakhupha ikhulu lesipani seenjomani zeenkarana kwathi eziseleko waziqunta imisipha yeenqatha. ₅Kwathi lokha ama-Arami weDamaseku nezako bona asize uHadadi-Ezeri ikosi yeTsoba, uDavida warhadla phasi iinkulungwana ezimatjhumi amabili nambili zawo. ₆Wajamisa iinqhema zamajoni embusweni wama-Arami eDamaseku. Ama-Arami asebenzela uDavida abe aletha nemithelo kuye. USomnini wapha uDavida ukuhlula koke lapha akhamba khona.

₇UDavida wathatha iinlanda zegolide egade kungezeenduna kaHadadi-Ezeri waziletha eJerusalema. ₈Ikosi uDavida yathatha idzila enengi eBhetharhi neBherothayi ekumimizi egade ingekaHadadi-Ezeri.

₉Lokha uToyi ikosi yeRhamathi ezwa bona uDavida uhlule loke ibutho lakaHadadi-Ezeri, ₁₀wathumela uJoramu indodanakhe kuDavida ukumbingelela nokumkwakwazela ekuhluleni kwakhe ipi kaHadadi-Ezeri ngombana uHadadi-Ezeri bekahlala alwa naye. UJoramu waphathela uDavida izipho zesiliva, igolide kanye nedzila. ₁₁UDavida wanikela ngeziphezo kuSomninini njengombana bekenzile ngesiliva negolide agade alithumbe kizo zoke izizwe azihlulileko. ₁₂Izizwezi gade kuma-Arami, amaMowabi, ama-Amoni, amaFilista kanye nama-Amalekhi. Wanikela nangepango ayifunyene kuHadadi-Ezeri umsa kaRerhobi ikosi yeTsoba.

₁₃Ekubuyeni kwakaDavida epini, wamadlha iinkulungwana ezilitjhumi nobunane zama-Edomu ngemRhobeni weTswayi. Lokhu kwamenza waduma khulu. ₁₄Wajamisa iinqhema zamajoni kilo loke lakwa-Edomu. Ama-Edomu woke amsebenzela. USomnini wapha uDavida ukuhlula koke lapha akhamba khona.

₁₅UDavida wabusa phezu kwaka-Israyeli woke, wagweba ngokulungileko boke abeza kuye ngemiraro. ₁₆UJowabi umsa kaTseruya gade amphathi webutho; uJehotjhafathi umsa ka-Arhiludi kungusosiba; ₁₇uTsadokhi umsa ka-Arhithubi no-Arhimeleki umsa ka-Abiyatari bekubaphristi; uSeraya angumabhalana; ₁₈uBhenaya umsa kaJehoyada gade aphethe amaKereti namaPeleti; abesa bakaDavida nabo bebabaphristi.