2 USAMYELA 7

₁Emuva kokobana ikosi uDavida seyinzinze esigodlweni sayo noSomnini selayiphe ukuphumula ezitheni zayo zoke eziyizombelezileko, ₂yathi kuNathani umphorofidi: “Akhese uqale, mina ngihlezi ngesigodlweni somsedari ukube umfaji kaZimu wona usele ngetenjaneni.” ₃UNathani waphendula ikosi uDavida wathi: “Ikosami ayenze ngokubona kwayo ngombana uSomnini uZimu unayo.”

₄Ngobusukobo ilizwi lakaSomnini lafika kuNathani lathi: ₅“Khamba ufese utjele incekwami uDavida uthi, ‘Nakhu uSomnini akutjhwileko: Wena ufuna ukungakhela indlu bona ngihlale kiyo na? ₆Mina akhange khengihlale ngendlini kusukela mhlana ngikhupha bakwa-Israyeli eGibhide bekube namhlanjesi. Bengiseze ngidlhedlha ngetende nginganabuhlalo. ₇Azange khengitjho litho ngendlu lokha nangidlhedlha nama-Israyeli. Phakathi kwabo boke ababusi engabakhetha bonyana beluse abantu bami u-Israyeli, akakho engambawa bona angakhele indlu yomsedari.’

₈“Nje-ke, yewutjele uDavida incekwami uthi, ‘Nakhu uSomnini uMninimandlawoke akutjhwileko: Mina ngakususa emadlelweni nekweluseni umhlambi bona ube yikosana yesizwe sami u-Israyeli. ₉Ngibe nawe nomaphi la uya khona, ngaphelisa nezitha zakho zoke phambi kwakho. Nje-ke ngizokwenza ube ngomunye wabadumileko ephasini. ₁₀Ngizokulungiselela isizwe sami u-Israyeli indawo, ngisinzinzise ukuze sibe nekhaya laso singasaphazamiseki. Iinkhohlakali azisoze zisabagandelela njengombana zenzile ekuthomeni, ₁₁lokha nangibeka ababusi phezu kwabantu bami u-Israyeli. Godu ngizaniphumuza kizo zoke izitha zenu. Mina Somnini ngiyakwazisa bonyana ngizokwakhela indlu. ₁₂Lokha amalangakho selaphelile sewuphumule kiboyihlomkhulu, esikhundleni sakho ngizakuvusa omunye esizukulwaneni sakho seengazi, ngiqinise umbuswakhe. ₁₃Kuzakuba nguye owakha indlu lapha ngizakuba khona. Ngizakuqinisa ubukhosi bakhe bujame mndundu. ₁₄Ngizakuba nguyise yena abe yindodanami. Lokha nalelesako, ngizamritha njengobaba nanunga umntwanakhe. ₁₅Kodwana ukwethembeka kwami angeze ngakususa kuye njengombana ngenza kuSawula, engamsusa phambi kwakho. ₁₆Indlwakho nombuswakho kuzakujamela futhi phambi kwami. Isihlalo sakho sobukhosi sihlale mndundu.’ ”

₁₇UNathani wakhuluma kuDavida woke amezwi wesambulweso.

₁₈Ikosi uDavida yangena ngetendeni yahlala ebukhoneni bakaSomnini, yafese yathi: “Somnini Somandla, bengiyini mina, nomdenami uyini bonyana ungangirhola bekube lapha na? ₁₉Kuba sengathi akukaneli ebusweni bakho Somnini Somandla, ubuye godu wakhuluma ngelikusasa lendlu yencekwakho. Somnini Somandla, kghani le yindlela ejayelekileko ovane usebenze ngayo nomuntu? ₂₀Incekwakho uDavida ingabuye ithini nje kuSomninini ngombana uSomnini uSomandla uyayazi incekwakhe. ₂₁Wenze izinto ezikulwezi ngombana uthembisile nokobana bezisehliziywenakho, bewazazisa incekwakho. ₂₂Maye Somnini Somandla, uthi umkhulu na! Ngokuya ngesikuzwileko, akakho ofana nawe begodu akakho uZimu ngaphandle kwakho.

₂₃“Ngisiphi esinye isizwe ephasini esinjengabantu bakho u-Israyeli. U-Israyeli sisizwe uZimu asihlenga bona sibe babantu bakhe nokobana azenzele ibizo. Wenza iimanga ezikulu nezesabekako ngokuqotjha phambi kwaso ezinye izizwe nabozinyana bazo. ₂₄Ujamise abantu bakho u-Israyeli bona babe ngabakho isiphelani, wena-ke Somnini unguZimabo.

₂₅“Nje-ke Somnini Zimu, zalisa isiphelani iinthembiso ozenzileko mayelana nencekwakho kanye nendlwayo. Yenza njengombana uthembisile ₂₆ukuze ibizo lakho libe likhulu isiphelani. Yeke abantu bazakuthi, ‘USomnini uMninimandlawoke unguZimu phezu kwaka-Israyeli.’ Inga indlu yencekwakho uDavida ingajama inzinze phambi kwakho ₂₇ngombana wena Somnini Mninimandlawoke, Zimu ka-Israyeli, wembule lokhu encekwinakho ngokwakho wathi, ‘Ngizakwakhela indlu.’ Ngikho incekwakho ifunyene isibindi sokobana ithandaze kuwe umthandazo lo. ₂₈Iye Somnini Somandla unguZimu! Amezwakho athembekile begodu namezwi amahle owakhulume encekwinakho la athembekile. ₂₉Nje-ke ngibawa bonyana ubusise indlu yencekwakho ukuze iphumelele isiphelani phambi kwakho. Wena Somnini Somandla ukhulumile, nangesibusiso sakho indlu yencekwakho izakubusiseka isiphelani.”