UDavida utlolisa abantu bakwa-Israyeli nebakwaJuda
1Godu ubukhali bakaSomnini behlela phezu kwaka-Israyeli. USomnini watjitjizela uDavida bona ajamelane no-Israyeli wathi: “Khamba ufese ubale u-Israyeli noJuda.”
2Yeke uDavida wathi kuJowabi neenduna zamabutho: “Khamba uqale kizo zoke iinkoro zakwa-Israyeli ukusuka kwaDani ngetlhagwini ukuya eBheritjheba ngesewula, utlolise amadoda wepi ukuze ngazi bonyana mangaki.”
3Kodwana uJowabi waphendula uDavida wathi: “Inga uSomnini uZimakho angandisa amabutho kalikhulukhulu, godu inga amehlo wekosami angawabona. Alo, kubayini ikosami ifuna kwenziwe njalo?”
4Kodwana uDavida wahlula uJowabi neenduna zepi ngamezwi; basuka phambi kwakhe bakhamba bayokutlolisa amadoda wepi wakwa-Israyeli. 5Bayama iJordani bathoma ukubala e-Aroyeri, ngemlanjeni ongesewula yedorobho. Ukusuka lapho badlulela eGadi neJayezere. 6Banqomba ngetlhagwini badabula eGiliyadi bebayokufika eKadetjhi hlanu kwenarha yamaHite. Ukusuka lapho baya eDani-Jayani bajikela ngetjingalanga baya eTsidoni. 7Badlulela eTirosi idorobho elinemithangala nakiwo woke amadorobho wamaHivi newamaKanana. Bagcina ngokuya eBheritjheba ngesewula yakwaJuda. 8Ngemva kobana sele bayibhadule yoke inarha, babuyela eJerusalema ngemva kweenyanga ezilithoba namalanga amatjhumi amabili. 9UJowabi wazisa uDavida ngesibalo samadoda wepi: Kwa-Israyeli kwaphuma iinkakaramba zamadoda aziinkulungwana ezimakhulu abunane akwazi ukulwa ngesabula, kwaJuda khona kwaphuma iinkulungwana ezimakhulu amahlanu.
10Ngemva kwalokho uDavida wathoma ukuzisola ehliziyweni ngokubala kwakhe amadoda wepi, wathi kuSomnini: “Maye mina, ngonile ngesenzo samesi. Ngiyabawa Somnini, libalela umlandu wencekwakho. Ubudlhadlha abelatjhwa.”
11UDavida navuka ekuseni ngakusasa, uGadi umphorofidi ombonakhe gade sele afunyene ilizwi lakaSomnini elithi: 12“Khamba ufese uthi kuDavida uZimu uthi, ‘Ngikunikela izinto ezintathu. Khetha kube kunye kwazo ofuna bona ngikuhlunguphaze ngayo.’ ” 13UGadi waya-ke kuDavida wathi kuye: “Khetha phakathi kokwehlelwa sisomiso enarhenakho iminyaka emithathu yoke, nanyana iinyanga ezintathu unganasikhundla njengomqasa ugijinyiswa zizitha zakho, nanyana amalanga amathathu wamatshwenyeko enarhenakho. Cabangisisa kuhle, nawuqedileko ungitjele ukuze ngibe negama engilibuyisela kongithumileko.”
14UDavida wathi kuGadi: “Ngisenyakanyakeni nanginje. Kungcono siwele ezandleni zakaSomnini ngombana yena umusakhe mkhulu; ngingaba yini ezandleni zabantu.”
15Ngebangelo-ke uSomnini warhadla inarha yakwa-Israyeli ngamanikelela ukusuka mhlokho ekuseni bekwaba sikhathi esibekiweko. Kwafa abantu abaziinkulungwana ezimatjhumi alikhomba ukusuka kwaDani ngetlhagwini ukuya eBheritjheba ngesewula. 16Kuthe lokha ingilozi nayelula isandla bona irhayile iJerusalema, uSomnini warhawuka ngebanga lamatlhuwo wathi engilozini leyo: “Kahle! Kwanele! Khawula kwanjesi.”
Ingilozi kaSomnini gade iseselelweni saka-Arawuna umJebusi. 17UDavida nabona ingilozi egade irhadla abantu wathi kuSomnini: “Ngimi owonileko ngokwenza okumbi. Abantwaba sezizimvu nje. Boneni kangaka? Isandla sakaSomnini asiwele phezu kwami nomzami.”
18Mhlokho uGadi waya kuDavida wathi kuye: “Khuphuka bese wakhela uSomnini i-aldari eselelweni saka-Arawuna umJebusi.”
19UDavida wakhuphuka njengombana uSomnini bekalayezele ngoGadi. 20Lokha u-Arawuna nambona eza neensebenzi zakhe, waphuma waguqa phambi kwakhe wahloma ihloko phasi, 21wathi: “Ndabezitha, kubayini ikosami ikhambele incekwayo?”
UDavida wathi: “Ngize ukuzokuthenga iselelo sakho bonyana ngakhe i-aldari lakaSomnini khona kuzakukhawuka amatshwenyeko ehlele abantu.”
22U-Arawuna wathi kuDavida: “Ikosami ayithathe nanyana yini eyibona iyihle inikele ngayo. Nanzi neenkabi zomnikelo wokutjhiswa, nanzi neenleyi zesibhulo kanye namajogi weenkabi kobana kubaswe. 23Maye kosami, mina Arawuna ngithi ikosi ayizenzele.” Godu wathi u-Arawuna: “Inga uSomnini uZimakho angamukela umhlabelwakho.”
24Kodwana uDavida wathi ku-Arawuna: “Awa, angikukhokhele. Angeze bengithome ngenzele uSomnini umhlabelo wokutjhiswa wasimahla.”
Nje-ke uDavida wathenga iselelweso kanye neenkabi ngamatjhumi amahlanu wamatjhekeli wesiliva. 25UDavida wakhela uSomnini i-aldari lapho bewenza imihlabelo yokutjhiswa neminikelo yetjhebiswano. USomnini waphendula umthandazo wenarha, kwathi amatshwenyeko ehlele u-Israyeli akhawuka.
