2 UPITROSI 1

₂Sengathi kungavama kini umusa nokuthula ekwazini uZimu noJesu iKosethu.

₃Amandlakhe akhethekileko asiphe koke esikudingako ekuphileni nekukholweni ngokwazi kwakhe loyo owasibiza ngephazimulo nokulunga kwakhe. ₄Ngalokho wasipha iinthembiso eziligugu nezikulu ukuze kuthi ngazo nibalekele iinkanuko zokonakala okusephasineli, nibe bahlanganyeli besimilo esihle sokukholwa. ₅Ngesizathwesi-ke khuthalani bona ningezelele ukukholwa kwenu ngokuhle, nokuhle ngelwazi; ₆ilwazi ngokuzibamba, ukuzibamba ngokunyamezela, ukunyamezela ngokwesaba uZimu; ₇ekumesabeni uZimu ningezelele ukuzwana, ekuzwaneni ithando. ₈Nangabe izintwezi ninazo begodu zivamile phakathi kwenu, zinenza bona ningabi ngabavilaphako nabanganazo iinthelo ekwazini iKosethu uJesu Krestu. ₉Loyo okungekho kuye izintwezi ubona lififi, usiphofu begodu ukhohliwe bonyana ukhe wahlanjululwa ezonweni zakhe ngaphambilini.

₁₀Ngalokho-ke bazalwana, khuthalani khulu nibonise ukubizwa nokukhethwa kwenu ngombana nanenza lokho angekhe nakhubeka. ₁₁Ngendlela leyo nizakwamukeliswa ngokuphuphumako ukungena embusweni ongapheliko weKosethu noMsindisi, uJesu Krestu.

₁₂Ngalokho ngizimisele ukuhlala nginikhumbuza ngezintwezi, nanyana senizazi begodu nibambelele eqinisweni esele ninalo. ₁₃Ngikubona kufanele bona ngivuselele imikhumbulwenu ije nje ngisaphila ngemtlhatlhaneni omzimba lo ₁₄ngombana ngiyazi bona ukususwa komtlhatlhanami lo sekuseduze, njengombana neKosethu uJesu Krestu seyikukhanyisile nje lokho kimi. ₁₅Yeke ngizokwenza imizamo yoke bona kuthi emva kokugoduka nikwazi ukuhlala nikhumbula izintwezi.

₁₆Eqinisweni besingalandeli iintolwana zobuhlakani ngesikhathi sinazisa amandla nokufika kweKosethu uJesu Krestu, kodwana besingilabo ababona ngamehlo amandla wobukhosi bakhe. ₁₇Wamukela idumo nephazimulo kuZimu uBaba, nakafikelwa lilizwi ngobukhosi bephazimulo lisithi: “Le yiNdodanami engiyithandako, engithaba khulu ngayo.” ₁₈Thina ngokwethu sazizwela ilizwelo livela ezulwini, lokha nabesinaye entabeni ecwengileko.

₁₉Sinelizwi lesiphorofido eliqinisekisiweko. Nizabe nenza kuhle nanililalelako kube ngathi kusibani esikhanyisako ebumnyameni, bekube yitathakusa nekhwezi lokusa liphumele eenhliziyweni zenu. ₂₀Ngaphezu kwakho koke kufanele nilemuke kuhle bona asikho isiphorofido somtlolo esingahlathululwa mumuntu ngokwazi kwakhe ₂₁ngombana asikho isiphorofido esakhe seza ngentando yomuntu; kodwana abantu bakhuluma okungekwakaZimu, basunduzwa nguMoya oCwengileko.