UmTjhunemikazi ubuyiselwa ipahlakhe
1U-Elitjha wathi emfazini avusa indodanakhe ekufeni: “Zilungiselele wena nendlwakho; nikhambe niyokukhonza nanyana kukuphi lapha kungakghonakala khona ngombana uSomnini uZimu umemezele iminyaka elikhomba yendlala enarheni.”
2Umfazi lo wazilungiselela wenza njengombana umuntu kaZimu gade atjhwile. Yena nendlwakhe baya enarheni yamaFilista bakhonza lapho iminyaka elikhomba. 3Ekupheleni kweminyaka elikhomba babuya enarheni yamaFilista, wayokulila ekosini kobana imsize ukubuyisa indlwakhe nenarhakhe.
4Ikosi beyisakhuluma noGerhazi inceku yomuntu kaZimu, isithi: “Ngitjela zoke izinto ezikulu u-Elitjha azenzileko.”
5Kwathi uGerhazi asadembela ikosi bona u-Elitjha wavusa njani ofileko, kwafika umfazi u-Elitjha agade avuse umntanakhe ekufeni azokulila bona ikosi imsize ukubuyisa indlwakhe nenarhakhe. Yeke uGerhazi wathi: “Ndabezitha, kosami, umfazi nguye lo, nendodana ngiyo le u-Elitjha ayivusa ekufeni.”
6Ikosi yabuza umfazi ngendaba le, umfazi wayihlathululela. Nje-ke yamnikela umjameli osikhulu kobana atjheje isibawo somfazi lo, yathi kuye: “Qiniseka bonyana ufunyana zoke izinto ekungezakhe, ngitjho nemikhiqizo yoke yenarhakhe kusukela ngesikhathi akhamba ngaso bekube kunamhlanje.”
Ukufa kwakaBhen-Hadadi
7U-Elitjha waya eDamaseku lapha bekugulela khona uBhen-Hadadi ikosi ye-Aramu. Kwathi lokha ikosi nayibikelwa bona umuntu kaZimu sekafikile eDamaseku 8yathi kuRhazayeli: “Thatha isipho ukhambe naso uyokuhlangabeza umuntu kaZimu, ubuze uSomnini uZimu ngaye uthi: ‘Ngizakuphuluka esifeni sami na?’ ”
9URhazayeli waphuma ukuyokuhlangabeza u-Elitjha, akhamba namakamela amatjhumi amane, athwele zoke izinto ezihle zeDamaseku. Wafese wajama phambi kwakhe wathi: “Indodanakho uBhen-Hadadi ikosi ye-Aramu ungithumile bona ngimbuzele ngithi, ‘Ngizakuphuluka esifeni sami na?’ ”
10U-Elitjha waphendula wathi: “Khamba ufese umtjele uthi, ‘Iye, uzakuphuluka,’ nokho uSomnini uZimu wambulile kimi bona yena uzakuhlongakala.”
11U-Elitjha warhudulela uRhazayeli amehlo, wamqalisisa bewadliwa ziinhloni. Khonapho umuntu kaZimu wathoma ukulila.
12URhazayeli wabuza wathi: “Alo, ikosami ililelani?”
U-Elitjha waphendula wathi: “Kungombana ngiyawazi umonakalo ozowenza kuma-Israyeli. Uzokuthungelela umlilo eendaweni zawo ezinemithangala, ubulale amadodanawo ngesabula, usakaze amasana phasi usike nabasidisi izisu.”
13URhazayeli wathi: “Alo, incekwakho ingaphumelela njani ukwenza isihluku esingaka njengombana iyinja nje?”
U-Elitjha waphendula wathi: “USomnini uZimu ungibonisile bona uzokuba yikosi ye-Aramu.”
14Yeke uRhazayeli watjhiya u-Elitjha wabuyela ekosinakhe. UBhen-Hadadi wabuza wathi: “Alo, utheni u-Elitjha kuwe?” URhazayeli waphendula wathi: “Uthe kimi, ‘Nakanjani uzokuphuluka.’ ”
15Kodwana ngakusasa wathatha itjhila lokugubuzesa walenya ngemanzini, wagubuzesa ubuso bekosi ngalo yaba nesimuku beyahlongakala. Nje-ke uRhazayeli waba yikosi esikhundleni sakaBhen-Hadadi.
UJehoramu ubusa kwaJuda
16Ngomnyaka wesihlanu wokubusa kwakaJoramu umsa ka-Arhabi ikosi yakwa-Israyeli, uJehotjhafathi aseseyikosi yakwaJuda, uJehoramu indodanakhe wathoma ukubusa njengekosi. 17Gade aneminyaka ematjhumi amathathu nambili lokha nakathoma ukubusa njengekosi. Wabusa eJerusalema iminyaka ebunane. 18Wakhamba eendleleni zamakhosi wakwa-Israyeli njengombana indlu ka-Arhabi yenza ngombana vele watjhada indodakazi ka-Arhabi. Wenza ubumbi phambi kwakaSomnini uZimu. 19Nokho ngenca yencekwakhe uDavida, uSomnini uZimu bekangakazimiseli ukubhubhisa uJuda ngombana bekathembise ukugcinela uDavida neenzukulwana zakhe isibani bekube siphelani.
20Ngesikhathi sokubusa kwakaJehoramu, u-Edomu wahlubuka uJuda bewazibekela ikosakhe. 21Yeke uJehoramu waya eTsayire kanye nazo zoke iinkarana zakhe. Ama-Edomu amvimbezela kanye nendunakhe yekarana. Wazilungiselela ngobusukobo wasahlela ama-Edomu, kodwana ibutho lakhe lona labaleka labuyela ekhaya. 22Kuze kube kunamhlanje, u-Edomu ube lihlubuka kuJuda. Ngesikhatheso iLibhina nayo yavuka umbhejazana.
23Zoke izehlakalo zokubusa kwakaJehoramu nalokho akwenzileko, kutlolwe encwadini yemilando yamakhosi wakwaJuda. 24UJehoramu wahlongakala bewabulungwa kiboyisemkhulu eMzini kaDavida. U-Arhaziya indodanakhe waba yikosi esikhundleni sakhe.
U-Arhaziya ubusa kwaJuda
25Ngomnyaka wetjhumi nambili wokubusa kwakaJoramu umsa ka-Arhabi ikosi yakwa-Israyeli, u-Arhaziya umsa kaJehoramu ikosi yakwaJuda, wathoma ukubusa. 26U-Arhaziya bekaneminyaka ematjhumi amabili nambili lokha nakaba yikosi. Wabusa eJerusalema umnyaka munye. Ibizo lakanina bekungu-Ataliya isizukulwana saka-Omri ikosi yakwa-Israyeli. 27Walandela indlu ka-Arhabi ngokwenza ubumbi phambi kwakaSomnini ngombana gade amkhwenyana ka-Arhabi.
28U-Arhaziya waphuma noJoramu umsa ka-Arhabi ukuyokulwa noRhazayeli ikosi ye-Aramu eRamothi eGiliyadi. Ama-Aramu alimaza uJoramu. 29Ikosi uJoramu yabuyela eJizriyela ukuyokupholisa amanceba eyawafunyana ngokuhlatjwa ma-Aramu eRamothi lokha nayilwa noRhazayeli ikosi ye-Aramu. Nje-ke u-Arhaziya umsa kaJehoramu ikosi yakwaJuda, wehla ukuyokubona uJoramu umsa ka-Arhabi eJizriyela ngombana gade alinyaziwe.
