UHosiya uba yikosi yokugcina kwa-Israyeli
1Ngomnyaka wetjhumi nambili ka-Arhazi ikosi yakwaJuda, uHosiya umsa ka-Ela waba yikosi yakwa-Israyeli eSamariya. Wabusa iminyaka elithoba. 2Wenza ubumbi phambi kwakaSomnini, kodwana ingasi njengamakhosi wakwa-Israyeli agade abuse phambi kwakhe.
3UTjhalimaneseri ikosi ye-Asiriya wakhuphuka bona asahlele uHosiya. UHosiya waba sikhonzi sakhe begodu wakhokha nemithelo kuye.
4Kodwana ngemva kwesikhathi ikosi ye-Asiriya yafunyana bona uHosiya liqili ngombana gade athumele abazenda esikhulwini esiphezulu sekosi yeGibhide. Begodu gade angasakhokhi imithelo ekosini ye-Asiriya njengombana gade asenza qobe mnyaka. Ngebangelo ikosi ye-Asiriya yambamba yamfaka ngesikhungweni.
5Yeke ikosi ye-Asiriya yasahlela yoke inarha, yavimbezela iSamariya bekwaba minyaka emithathu. 6Ngomnyaka wethoba kaHosiya ikosi ye-Asiriya yathumba iSamariya beyathumela ama-Israyeli ekudingisweni e-Asiriya. Yawahlalisa eRhalarhi, neGozani magegana nomlambo iRhabhori nemizini yamaMede.
Isizathu sokuthunjwa kwama-Israyeli
7Koke lokhu kwenzeka ngombana ama-Israyeli ona kuSomnini uZimawo, owawenyula eGibhide emandleni kaFaro ikosi yeGibhide. Asuka alotjha abosingazimu 8abe alandela amasiko wakosobantu okuzizizwe uSomnini aziqotjha phambi kwawo. Enza nemikhuba eyavezwa makhosi wakwa-Israyeli. 9Ama-Israyeli aba nemikhumbulo engakalungi ngoSomnini uZimawo. Kusukela esithaleni sabalindi ukuya edorobheni elinemithangala, azakhela iindunduma emizinawo yoke. 10Azijamisela amatje akhethekileko nemifanekiso yabo-Atjhera komunye nomunye umbundu ophakamileko nangaphasi komunye nomunye umuthi ohlaza.
11Atjhisa itjhwalo kizo zoke iindunduma, enza njengezizwe uSomnini azidingisa phambi kwawo. Enza izinto zobukhohlakali ezathukuthelisa uSomnini. 12Alotjha amanyala wabosingazimu nanyana uSomnini bekathe: “Lokhu ningakwenzi.” 13USomnini wayelelisa u-Israyeli noJuda ngabaphorofidi nababoni wathi: “Tjhugulukani eendleleni zenu ezimbi. Phethani imiyalwami nemithethwami, ukuya ngokomyalo engayala ngawo aboyihlo nengawuthumela kini ngeenceku zami abaphorofidi.”
14Kodwana akhange balalele, kunalokho bakhunyalala njengaboyise abangazange bathembe uSomnini uZimabo. 15Badela imiyalwakhe nesivumelwano sakhe asenza naboyise kanye neemfuneko abalemukisa ngazo. Balandela umlotha nabo baba mlotha. Balingisa izizwe ezibabhodileko uSomnini abayala ngazo bonyana bangazilingisi.
16Bafulathela yoke imiyalo kaSomnini uZimabo bebazenzela abosingazimu ababaziweko abamakonyana amabili; bazakhela nemifanekiso ka-Atjhera. Bakhothamela zoke iinkwekwezi zomkayi bebalotjha noBhali. 17Banikela amadodana namadodakazabo bona abe mhlabelo. Baphengula, bebafunisela, bazithengisa ngokwenza okumbi phambi kwakaSomnini, bamthukuthelisa.
18Yeke uSomnini wasilingeka khulu ngo-Israyeli bewamsusa phambi kwakhe. Akakho owasalako ngaphandle kwekoro yakwaJuda kwaphela. 19Naye uJuda loyo akhange alonde imiyalo kaSomnini uZimakhe. Walandela imikhuba ebigade sele ifakwe ngu-Israyeli. 20Ngebangelo-ke uSomnini wadela soke isizukulwana saka-Israyeli; wasenzela isizi bewasinikela ezandleni zabahlanguli, wasiqeda nya phambi kwakhe.
21Kuthe lokha uSomnini nahlukanisa u-Israyeli nendlu kaDavida, u-Israyeli wabeka uJerobhowamu umsa kaNebathi bona abe yikosakhe. UJerobhowamu wahlubukisa u-Israyeli ekulandeleni uSomnini, wamenza bona enze isono esikhulu. 22Ama-Israyeli aragela phambili nezono zakaJerobhowamu; akhange aphambuke kizo 23bekwaba kulokha uSomnini awasusa phambi kwakhe njengombana ayelelisa ngazo zoke iinceku zakhe abaphorofidi. Yeke u-Israyeli waya ekudingisweni, wasuka enarheni yekhabo wasiwa e-Asiriya, useselapho nanamhlanje.
Ikosi ye-Asiriya inzinzisa godu ezinye izizwe eSamariya
24Ikosi ye-Asiriya yathatha abantu beBhabheli, beKhutha, be-Ava, beRhamathi nabeSefarivayimu yabahlalisa eSamariya esikhundleni sama-Israyeli. Bathumba idorobho iSamariya bebahlala nakamanye amadorobho wesifunda. 25Ekufikeni kwabo endaweni leyo, akhange besabe bebalotjhe uSomnini; yeke uSomnini wabathumela ngeengwenyama zafese zabulala abanye babo. 26Kwabikwa ekosini ye-Asiriya kwathiwa: “Izizwe ozithumbe bewazihlalisa emadorobheni weSamariya, aziyazi imiyalo kazimu olotjhwa enarheni le. Yeke uzinikelele ngeengwenyama; qala, ziyaziqeda ngombana aziyazi imiyalo kazimu olotjhwa enarheni le.”
27Nje-ke ikosi ye-Asiriya yakhupha naku umyalo yathi: “Thumelani munye wabaphristi enamthumba enarheni leyo abuyele lapho ukuze afundise abantu imiyalo kazimu olotjhwa enarheni le.”
28Yeke omunye wabaphristi ogade alithunjwa leSamariya weza wazokuhlala eBhethe-Eli wabafundisa indlela yokulotjha uSomnini. 29Kodwana izizwe ezahlukahlukeneko zaragela phambili ngokuzenzela iinthombe zabozinyana bazo. Zabajamisa emathempedlaneni aseendundumeni egade zakhiwe babantu beSamariya: 30Amadoda weBhabheli azenzela isithombe sakaSukothi-Bhenothi, weKhutha enza isithombe sakaNerigali, kwathi weRhamathi wona azenzela saka-Atjhima; 31ama-Ava enza isithombe sakaNibhirhazi noTaritakhi. AmaSefarivayimu wona anikela abantabawo emlilweni njengomhlabelo ku-Adramelekhi naku-Anameleki abozinyana babo. 32Godu balotjha uSomnini uZimu, kodwana bazikhethela abantu babo abahlukahlukeneko bona babe baphristi beendundumeni. Abaphristabo benzela abantwabo imihlabelo emathempedlaneni aseendundumeni. 33Yeke besaba uSomnini uZimu, kodwana basalotjha nabozinyana babo njengomkhuba wezizwe zalapho bebasuswe khona.
34Ama-Israyeli agade asele enarheni aragela phambili nemikhubawo yakade bekube namhlanjesi. Akhange esabe uSomnini uZimu begodu akhange aphethe iimiso, imithetho, isiyeleliso kanye nomyalo uSomnini awunikela iinzukulwana zakaJakopo bewamthiya bona ngu-Israyeli. 35USomnini gade enze isivumelwano nama-Israyeli bewawayala wathi: “Ningesabi abozinyana, ningabakhothameli, ningabalotjhi begodu ningabenzeli imihlabelo. 36Kodwana uSomnini owawenyula eGibhide ngamandla amakhulu nangesiphanga sakhe, nguye yedwa ekufuze nimesabe: Khothamani kuye begodu nenze imihlabelo kuye. 37Tjhejani bona epilweni yenu yoke niphetha iimiso, imithetho, isiyeleliso kanye nomyalo anitlolela wona.
“Ningalotjhi abozinyana 38begodu ningakhohlwa isivumelwano engasenza nani. Ningabalotjhi abozinyana, 39kodwana yesabani uSomnini uZimenu. Nguye yedwa ozanisindisa esandleni sezitha zenu zoke.”
40Nalapho akhange balalele, kodwana bakhunyalala benza imikhubabo yakade.
41Izizwe ezalethwa enarhenezo zesaba uSomnini uZimu, kodwana zaragela phambili nokukhothamela iinthombe zazo. Bekube namhlanje iinzukulu neenzukulwana zazo zisaragela phambili nokwenza njengaboyisemkhulu.
