2 KWEBEKORINTE 7

₂Akhe nisivulele indawo eenhliziyweni zenu. Akunamuntu esimonileko, akunamuntu esimtjhaphisileko, akakho nesimcaphazileko. ₃Angitjho lokhu ukuze nginilahle ngombana ngikhe ngatjho bona niseenhliziyweni zethu, sizokufa ndawonye besiphile ndawonye. ₄Nginesibindi khulu ngani begodu nginegugu khulu ngani. Ngigcwele ukududuzeka begodu ngithabe khulu ngazo zoke iinhlupheko zethu.

₅Kwamambala nanyana sesifikile eMasedoniya, imizimba yethu azange ifumane ukuphumula, kodwana sakhathazeka ngeendlela zoke; kwaba yipikiswano ngaphandle, ngaphakathi saba nokwesaba. ₆Kodwana uZimu oduduza abadanileko, wasiduduza ngokufika kwakaTitosi, ₇ingasi ngokuza kwakhe kwaphela, kodwana nangokududuzeka akufumana lapho kini. Wasitjela ngokungihlulukela kwenu, isililo senu nangetjisakalo eninayo ngami. Yeke ngathokoza ngaphezu kokwenza.

₈Ngitjho nanyana nganizwisa ubuhlungu ngencwadi yami leya, angizisoli ngayo. Iye, nanyana khengazisola phambilini nangibona bona nginizwise ubuhlungu ngencwadi leyo nje, nokho kwase kwaba sikhatjhana. ₉Kwanjesi ngiyathaba, ingasi ngombana nganizwisa ubuhlungu, kodwana ngebanga lokobana ubuhlungu benu bunenze bona nitjhuguluke ngombana nezwa ubuhlungu obuvela kuZimu. Ubuhlungobo basetjenziswa nguZimu. Nje-ke thina azange sinikhubaze nakancani. ₁₀Ubuhlungu obuvela kuZimu buveza ukutjhuguluka okudosela esindisweni begodu abulethi ukuzisola kodwana ubuhlungu obuvela ephasini buveza ukufa. ₁₁Qalani bona ubuhlungu enabuzwiswa nguZimu buveze ukukhuthala okungangani kini, iye, ukuzimisela okungakaya kobana nizikhuphe emlandwini, ekwesabeni, ekulangazeleleni, ekutjhisekeleni nekuhlunguphazweni. Nizibonakalise ninganamlandu kikho koke malungana nalokho.

₁₂Nje-ke nanyana nginitlolele, azange ngenze lokho ngebanga laloyo owonileko, namkha ngebanga laloyo owoniweko, kodwana ngenzela bona ukusitjhisekela kwenu kwazeke kini phambi koZimu. ₁₃Ngalokho siyaduduzeka.

Phezu kokududuzeka kwethu, sathokoza khulu ngokuthaba kwakaTitosi ngombana noke nje namenza bona umkhumbulwakhe uphole. ₁₄Nakube bengiseze ngizikhakhazisa ngani kuye, azange ngibe neenhloni, kodwana kube njengokweqiniso lakho koke ebesikutjho kini. Yeke ukuzikhakhazisa kwethu kuTitosi nakho kubonakele kuliqiniso. ₁₅Nje-ke ithando lakhe ngani landa khulu nakakhumbula ukuzithoba kwenu noke nokumamukela kwenu ngokwesaba nokuthuthumela. ₁₆Ngithabile ngombana nginethemba elipheleleko ngani.