2 KWEBEKORINTE 5

₁Siyazi bona nakudilika idladla lephasinapha esihlala ngakilweli, sinesakhiwo esivela kuZimu, ikumba engakenziwa ngezandla, engeyanini nanini ezulwini. ₂Nasingaphakathi kwedladleli siyabubula, silangazelela ukwembathiswa ubuhlalo bethu bezulwini ₃ngombana nasembathisiweko, angeze safunyanwa sibulanzi. ₄Nasisahlezi ngedladlenapha, siyabubula begodu siyadisibezeka ngombana asifisi ukwambulwa kodwana sifuna ukumbathiswa ngobuhlalo bethu bezulwini ukuze kuthi okubhubhako kuginywe kuphila. ₅Yeke nguZimu owasidalela sona isizathwesi bewasipha noMoya njengesibambiso.

₆Nje-ke sihlala sinesibindi ngaso soke isikhathi, nanyana sisazi bonyana nasisesekhaya ngemzimbeni lo, sikude neKosi ₇ngombana sikhamba ngokukholwa, asikhambi ngokubona. ₈Iye, sinesibindi begodu sinyula bona siwutjhiye umzimba lo, siyokuhlala neKosi. ₉Nje-ke nanyana sisekhayapha namkha sele sikhambile, sikwenza kube mnqopho wethu ukuyithokozisa iKosi. ₁₀Ngitjho ngombana soke sifanelwe kuvela phambi kwesihlalo sokugweba sakaKrestu ukuze ngiloyo naloyo amukeliswe umvuzo walokho akwenzileko nasesengemzimbenapha, kungaba ngokuhle namkha okumbi.

₁₁Ngalokho-ke njengombana thina sikwazi bona kuyini ukwesaba iKosi, silinga ukuzuza nabanye, nokho thina siyazeka kuZimu. Ngiyathemba bona nakunembeza wenu siyazeka. ₁₂Ngalokho asizidumisi kini, kodwana sininikela ithuba lokobana nizigqaje ngathi ukuze nikwazi ukuphendula labo abazigqaja ngokubonakala emehlweni ebangeni lokobana bazigqaje ngokusehliziyweni. ₁₃Nangabe siqaleka sirhapha, akutshwenyi, sirhaphela uZimu. Nangabe asirhaphi, kungebanga lenu. ₁₄Ithando lakaKrestu liyasiraga ngombana siyakholelwa bona munye owafela boke, nje-ke boke bafile. ₁₅Wafela boke ukuze kuthi labo abaphilako bangasaziphileli bona, kodwana baphilele yena owabafelako bewavuswa.

₁₆Ukusukela gadesi, yeke asisazukwazi umuntu ngokwenyama ngitjho nanyana sakhe sazi uKrestu ngokwenyama nje, nokho asisamazi njalo. ₁₇Nje-ke umuntu nasele akuKrestu, sewunesibumbeko esitjha: koke okudala kudlulile, qala, koke sele kwenziwe kwaba kutjha. ₁₈Koke lokhu kuvela kuZimu owasibuyisela kuye ngoKrestu bewasinikela ikonzo yokubuyisana, ₁₉okutjho bona uZimu wabuyisela iphasi kuye ngoKrestu. Azange abale iimphambeko zalo, kodwana wasinikela umyalezo wokubuyisana.

₂₀Nje-ke thina sibazenda bakaKrestu ngombana uZimu uzwakalisa isimemezelo sakhe ngathi. Yeke siyanincenga ebizweni lakaKrestu bona nibuyisane noZimu. ₂₁Wamenza bona abe sisono ngebanga lethu loyo ongazange asazi isono ukuze kuthi kuye sibe ngabalungisisiweko bakaZimu.