2 IINKRONIKE 36

₂UJehowarhazi gade aneminyaka ematjhumi amabili namithathu lokha naba yikosi. Wabusa eJerusalema iinyanga ezintathu.

₃Ikosi yeGibhide yamehlisa esihlalweni sobukhosi eJerusalema beyahlawulisa uJuda umthelo weenkulungwana ezintathu namakhulu amane wamakhilogremu wesiliva namatjhumi amathathu nane wamakhilogremu wegolide. ₄Ikosi yeGibhide yabeka umnakwabo kaJehowarhazi, u-Eliyakhimu, bona abe yikosi kwaJuda neJerusalema beyatjhugulula ibizo lakhe yamthiya bona nguJehoyakhimu. Kodwana uNeko wathatha uJehowarhazi umnakwabo ka-Eliyakhimu wamusa eGibhide.

₅UJehoyakhimu gade aneminyaka ematjhumi amabili namihlanu lokha naba yikosi. Wabusa eJerusalema iminyaka elitjhumi nanye. Wenza ubumbi phambi kwakaSomnini uZimakhe. ₆UNebukadinetsari ikosi yeBhabheli yamsahlela yambopha ngamakhamandela wekoporo yamusa eBhabheli. ₇UNebukadinetsari godu wathatha nepahla ethempelini lakaSomnini wayisa esigodlweni sakhe eBhabheli.

₈Ezinye izehlakalo zokubusa kwakaJehoyakhimu, izinto ezinyenyisako nakho koke okumbi akwenzako kutlolwe encwadini yamakhosi wakwa-Israyeli newakwaJuda. UJehoyakini indodanakhe waba yikosi esikhundleni sakhe.

₉UJehoyakini gade aneminyaka elitjhumi nabunane lokha nathoma ukuba yikosi. Wabusa eJerusalema iinyanga ezintathu namalanga alitjhumi. Wenza ubumbi phambi kwakaSomnini.

₁₀Kwathi ekuthomeni komnyaka uNebukadinetsari wathumela bonyana kulandwe uJehoyakini alethwe eBhabheli kanye nepahla yenani eliphezulu ethethwe ethempelini lakaSomnini. Wabeka uTsedekhiya isihlobo sakaJehoyakini bona abe yikosi kwaJuda neJerusalema.

₁₁UTsedekhiya gade aneminyaka ematjhumi amabili nanye lokha naba yikosi. Wabusa eJerusalema iminyaka elitjhumi nanye. ₁₂Wenza ubumbi phambi kwakaSomnini uZimakhe, azange azithobe phambi kwakaJoromiya umphorofidi owakhuluma kuye ilizwi lakaSomnini.

₁₃Godu wahlubuka ikosi uNebukadinetsari owamfungisa ebizweni lakaZimu. Wakhunyalala waqinisa ihliziywakhe wangafuna uSomnini uZimu wakwa-Israyeli. ₁₄Ukusuka lapho boke abarholi babaphristi kanye nabantu bathuwelela ngokungasathembeki, balandela woke amanyala enziwa zizizwe basilaphaza ithempeli lakaSomnini ebegade alihlambululile eJerusalema.

₁₅USomnini uZimu waboyisemkhulu wabathumelela ilizwi ngeenthunywa zakhe kanenginengi ngombana yarhawukela abantu bayo nendawayo yokuhlala. ₁₆Kodwana bahlekisa ngeenthunywa zakaZimu, banyaza amezwakhe bakokomeja nabaphorofidi bakhe kufikela lapha bavusa khona itukuthelo kaSomnini ebantwini bakhe bekwatlhogeka nentatha.

₁₇UZimu wabanikelela ngekosi yamaKasidi eyabulala amasokanabo ngesabula endaweni ecwengileko. Yona azange irhawukele amasokana, abantazana, abalupheleko neengoga. UZimu wabanikela boke njalo esandleni sakaNebukadinetsari. ₁₈UNebukadinetsari wabutha yoke ipahla ekulu nencani engethempelini lakaSomnini wayithwala wayisa eBhabheli. Wathanyela namagugu wethempeli lakaZimu namagugu wekosi neweenkhulu zayo. ₁₉Amajonakhe athungelela ithempeli lakaSomnini ngomlilo abhuruza umthangala weJerusalema; atjhisa zoke iingodlo, atjhabalalisa koke okuligugu okwakulapho. ₂₀UNebukadinetsari wathumba yoke imisalela eyaphunyurha esabuleni wayisa eBhabheli, yaba makhobokakhe kanye newamadodanakhe ukufikela lapha umbuso wePheresiya uthoma khona ukubusa.

₂₁Ngaleyondlela ilizwi lakaSomnini alikhuluma ngoJoromiya lazaliseka. Inarha yafumana amaSabathayo ebeyifanele iwafumana esikhathini esidlulileko, yaphumula soke isikhathi sokulahlwa kwayo, bekwaphelela iminyaka ematjhumi alikhomba.

₂₂Kwathi ngomnyaka wokuthoma wakaKoretjhi ikosi yePheresiya, uZimu wazalisekisa ilizwi elakhulunywa nguJoromiya ngokuthinta ihliziyo kaKoretjhi bonyana enze isimemezelo esitloliweko kiwo woke umbuswakhe: ₂₃“UKoretjhi ikosi yePheresiya uthi, ‘USomnini uZimu wezulwini unginikele yoke imibuso yephaseli beyangikhetha bonyana ngimakhele ithempeli eJerusalema kwaJuda. Nanyana ngubani wabantu bakhe ophakathi kwenwapha, inga uSomnini angaba naye, yeke akakhuphuke.’ ”