2 IINKRONIKE 27

₁UJotamu gade aneminyaka ematjhumi amabili nahlanu lokha naba yikosi. Wabusa eJerusalema iminyaka elitjhumi namithandathu. Ibizo lakanina gade kunguJerutjha, indodakazi kaTsadokhi. ₂Wenza okuhle phambi kwakaSomnini njengombana kwenza uyise u-Uziya. Kodwana yena azange angene ngethempelini lakaSomnini njengoyise. Nanyana kunjalo abantu bona baragela phambili nemikhuba yokonakala.

₃Nguye owavuselela isango elingaphezulu lethempeli lakaSomnini, wenza nomsebenzi omnengi emthangaleni wombundu we-Ofeli. ₄Wakha imizi emibundwini yakwaJuda kanye nobuphephelo neenthala zabalindi endaweni yamahlathi.

₅UJotamu walwa nekosi yama-Amoni wayihlula. Ngomnyaka lowo ama-Amoni amkhokhela iinkulungwana ezintathu namakhulu amahlanu wamakhilogremu wesiliva, iinkulungwana ezimatjhumi amahlanu zemigodla yekoroyi neenkulungwana ezimatjhumi amahlanu zemigodla yebhali. Nangomnyaka wesibili nowesithathu ama-Amoni abuyelela soneso.

₆UJotamu wadlondlobala ngombana wakhamba ngokwethembeka phambi kwakaSomnini uZimakhe.

₇Ezinye izehlakalo zokubusa kwakaJotamu, kanye nazo zoke izipi zakhe nokhunye akwenzileko, kutlolwe encwadini yamakhosi wakwa-Israyeli newakwaJuda. ₈Gade aneminyaka ematjhumi amabili namihlanu lokha nabayikosi begodu wabusa eJerusalema iminyaka elitjhumi nasithandathu. ₉UJotamu wahlongakala, wabulungwa kiboyisemkhulu eMzini kaDavida. U-Arhazi indodanakhe wathatha ubukhosi emva kwakhe.