2 IINKRONIKE 22

₁Abantu beJerusalema babeka u-Arhaziya indodana encani kaJehoramu bona abe yikosi esikhundleni sakhe ngombana iwoma lemigulukudu eleza nama-Arabhu labulala woke amadodanakhe amakhulu ekampeni yama-Arabhu. Ngalokho-ke u-Arhaziya umsa kaJehoramu ikosi yakwaJuda wathoma ukubusa. ₂U-Arhaziya gade aneminyaka ematjhumi amabili lokha naba yikosi. Wabusa eJerusalema umnyaka munye tere. Ibizo lakanina bekungu-Ataliya, isizukulwana saka-Omri.

₃Naye wakhamba eendleleni zendlu ka-Arhabi ngombana unina wamtlhotlholoja bona enze ubukhohlakali. ₄Wenza ubumbi phambi kwakaSomnini njengombana kwenza indlu ka-Arhabi ngombana ngemva kokuhlongakala kwakayise, bendlu ka-Arhabi baba beluleki bakhe. Lokhu kwabangela ukubhujiswa kwakhe.

₅Godu kwaba ngeenluleko zabo bonyana adlhemadlheme noJoramu umsa ka-Arhabi ikosi yakwa-Israyeli kobana bayokulwa noRhazayeli ikosi ye-Aramu eRamothi eGiliyadi. Ama-Aramu alimaza uJoramu; ₆wabuyela eJizriyela kobana aphole emancebeni awafumene eRamothi lokha nalwa noRhazayeli ikosi ye-Aramu. U-Arhaziya umsa kaJehoramu ikosi yakwaJuda wehlela eJizriyela kobana ayokubona uJoramu umsa ka-Arhabi ngombana gade alimele. ₇Ivakatjho laka-Arhaziya kuJoramu lambangela bona uZimu amwise. Kwathi u-Arhaziya nafikako, waphuma noJoramu kobana ahlangabeze uJehu umsa kaNimtjhi owakhethwa nguSomnini kobana abhubhise indlu ka-Arhabi.

₈Ngemva kobana uJehu aqede ukurhayila indlu ka-Arhabi, wafumana amakhosana wakwaJuda namadodana weenhlobo zaka-Arhaziya ebegade amphekelele. Wawabulala, ₉wasuka lapho wabhudulana no-Arhaziya ogade abhace eSamariya. Wabanjwa, walethwa kuJehu, wabulawa. Abantu bambulunga ngombana bathi: “Nokho gade asizukulwana sakaJehotjhafathi, owafuna uSomnini ngehliziywakhe yoke.”

Gade kunganamuntu endlini ka-Arhaziya onamandla wokobana angathatha ubukhosi. ₁₀Lokha u-Ataliya unina ka-Arhaziya nabona bonyana indodanakhe ihlongakele, waragela phambili ngokubhubhisa umndeni wobukhosi bendlu kaJuda. ₁₁Kodwana uJehotjhabathi indodakazi yekosi wathatha uJowatjhi umsa ka-Arhaziya ngemsitheleni hlangana namadodana wekosi ebe kumele abulawe. Wambeka nembelesakhe emphekghweni welawu lethempeli. UJehotjhabathi lo gade ayindodakazi yekosi uJehoramu engudadwabo ka-Arhaziya. Gade athethwe nguJehoyada umphristi omkhulu. Wafihla uJowatjhi bonyana u-Ataliya angambulali. ₁₂Wahlala afihlwe nabo ethempelini lakaZimu iminyaka emithandathu yokubusa kwaka-Ataliya enarheni.