2 IINKRONIKE 19

₁Kwathi lokha uJehotjhafathi ikosi yakwaJuda nabuyela ngokuphephileko esigodlweni sakhe eJerusalema, ₂uJehu umboni, umsa kaRhanani waphuma wamhlangabeza wathi kuye: “Waphuma-ke wayokusiza iinkhohlakali, wazwana nabazonda uSomnini uZimu! Ngebanga lalokho itukuthelo kaSomnini iphezu kwakho. ₃Nokho kukhonyana ukulunga kuwapha ngombana nakhu ususe imifanekiso yabo-Atjhera enarheni, wabeka ihliziywakho ekufuneni uZimu.”

₄Lokha uJehotjhafathi asahlala eJerusalema wathekela godu abantu ukusukela eBheritjheba ngesewula ukuya eentabeni zakwa-Efrayimi ngetlhagwini. Gade ahlose ukubuyisela abantwaba kuSomnini uZimu waboyisemkhulu. ₅Wabeka abagwebi kelinye nelinye idorobho elinemithangala enarheni yakwaJuda. ₆Wathi kibo: “Tjhejani lokho enikwenzako ngombana anigwebeli abantu kodwana nigwebela uSomnini uZimu ohlala anani njalo lokha nanikhupha isigwebo. ₇Nje-ke ukwesaba uSomnini akube phezu kwenu, nigwebe ngokutlhogomela ngombana kuSomnini uZimethu akukho ukungalungi, akunasikhozi namkha ukufunjathiswa.”

₈UJehotjhafathi wabeka godu eJerusalema amanye wamaLevi, abaphristi kanye nezinye zeenhloko zemindeni yakwa-Israyeli ukuze kubulungwe imiyalo kaSomnini nokobana bararulule ukungakhambisani ngemibono kwezakhamuzi zeJerusalema. ₉Wabanikela imiyalo le wathi: “Kumele nisebenze ngokuziphendulela kuSomnini, ngokwethembeka nangokuzimisela. ₁₀Khalimani abafowenu abahlala kamanye amadorobho kinamkha ngimuphi umbango olethwa phambi kwenu. Kungaba kuphambana ngokubulala namkha kungaba nanyana yini ephathelene nomthetho kaSomnini uZimu; bakhalimeni ukuze bangabi nomlandu kuSomnini nokobana itukuthelo kaSomnini ingehleli phezu kwenu nabafowenu. Ngokwenza njalo angekhe wazibangela umlandu. ₁₁U-Amariya umphristi omkhulu uzanengamela ekugwebeni zoke iindaba eziphathelene noZimu. UZebadiya umsa ka-Itjhimayeli omrholi wekoro yakwaJuda uzanengamela ekugwebeni zoke iindaba eziphathelene nekosenu. AmaLevi azakuba ziinkhulu eziniphetheko. Qinani nisebenze. Kwanga uSomnini angaba nabalungileko!”