2 IINKRONIKE 1

₁USolomoni umsa kaDavida wazakha waqina embuswenakhe ngombana uSomnini uZimakhe gade anaye begodu wamdlondlobalisa khulu. ₂Wenza imbizo yakwa-Israyeli woke: Wabiza iinduna zeenkulungwana neenduna zamakhulu, abagwebi neenkosana zoke zakwa-Israyeli okuziinhloko zemindeni.

₃USolomoni nembizo yoke bakhuphukela endundumeni eGibiyoni ngombana itende lakaZimu lokuhlanganela elenziwa nguMosi inceku yakaSomnini erhalawumbeni belilapho. ₄Ngesikhatheso umfaji kaZimu wesivumelwano gade useJerusalema ngombana uDavida bekawususe eKhiriyathi-Jeyarimu wawusa endaweni agade ayilungiselele wona, wawuhlomela itende eJerusalema. ₅Kodwana i-aldari lekoporo elenziwa nguBhetsalele umsa ka-Uri, omsa kaRhuri beliseGibiyoni ngaphambi kwethaberinakeli lakaSomnini; uSolomoni nehlangano babuza uSomnini lapho. ₆USolomoni wenza imihlabelo lapho phambi kwakaSomnini e-aldarini lekoporo ebelingaphambi kwetende lokuhlanganela. Wanikela khona imihlabelo yokutjhiswa eyikulungwana.

₇Ngobusukobo uZimu waziveza kuSolomoni wathi kuye: “Bawa nanyana yini ofuna ngikuphe yona.”

₈USolomoni waphendula uZimu wathi: “Uthembeke khulu kubaba uDavida ngokungibeka ngaba yikosi esikhundleni sakhe. ₉Nje-ke Somnini Zimu, isithembiso sakho kuDavida ubaba, asiqinisekiswe. Ngambala ungibeke ngaba yikosi phezu kwesinyokotho sabantu abangangethuli lequlwani, ₁₀yeke ngibawa ukuhlakanipha nelwazi, kobana ngikghone ukurhola abantwaba. Ngingaba yini ngabantu bakho abanengi kangakaba?”

₁₁UZimu wathi kuSolomoni: “Azange ukhombele umnono, ifuyo, idumo nokubulawa kwezitha zakho begodu azange ukhombele bonyana uphile isikhathi eside; kodwana wakhetha ukuhlakanipha kanye nelwazi lokobana ukwazi ukubusa abantu bami engikwenze waba yikosabo. Njengombana lokhu kube sifiso sakho, ₁₂nje-ke ngizakunikela ukuhlakanipha nelwazi. Phezu kwalokho ngizakupha nomnono, ifuyo kanye nedumo okungazange khekube nekosi eyaba nakho ngaphambilini namkha ngemva kwakho.”

₁₃Emva kwalokho uSolomoni wasuka etendeni lokuhlanganela egade lisendundumeni eGibiyoni, waya eJerusalema lapha afese wabusa khona phezu kwaka-Israyeli.

₁₄USolomoni wabuthelela iinkarana neenjomani; waba neenkarana eziyikulungwana namakhulu amane kanye neenjomani eziziinkulungwana ezilitjhumi nambili. Wazibeka emadorobheni weenkarana kanye nemzinakhe eJerusalema. ₁₅Ikosi uSolomoni yenza bonyana eJerusalema igolide nesiliva lijayeleke libe linengi njengamatje, nomsedari ube mnengi njengemithi yamakhiwani wommango eentatjaneni zenarha. ₁₆Iinjomani zakaSolomoni zazithethwe eGibhide, khulukhulu eKhewe. Zazithengwa barhwebi bekosini eKhewe ngentengo ephasi. ₁₇Abarhwebi bathenga ikarana yepi eGibhide ngesiliva engaphasi kwamakhilogremu alikhomba, nenjomani ngesiliva engaphasi kwamakhilogremu amabili. Godu bazithengisa kiwo woke amakhosi wamaHite newama-Aramu.