1 USAMYELA 12

₁USamyela wathi ku-Israyeli woke: “Nginilalele kikho koke enikukhulume kimi bengabeka nekosi phezu kwenu. ₂Gadesi-ke ninekosi eniphetheko. Mina-ke sengimdala, sengithukghele: Amadodanami ziintanga zenu. Soloko ngathoma ebutjheni bami ukuba mrholenu bekube gadesi. ₃Nakhu lapha ngikhona namhlanjesi, vezani ubumbi bami phambi kwakaSomnini naphambi kozesiweko wakhe. Ngakhe ngathatha ikomo kabani na? Ngakhe ngathatha udumbana kabani? Ngubani phakathi kwenu engakhe ngamgalaja na? Ngubani engakhe ngamgandelela? Ngubani owakhe wangifumbathisa kobana ngicimeze na? Nange kukhona enye yezinto kilezi engizitjhwileko engiyenzileko, ngizayilungisa.” ₄Abantu baphendula bathi: “Azange khewusigalaje namkha usigandelele. Azange khewufunjathiswe.” ₅USamyela wathi: “USomnini ungufakazi nozesiweko wakhe ungufakazi namhlanje kobana nithe azange ngenze litho elimbi.” Abantu bathi: “Iye, uSomnini ngufakazi.”

₆Yeke uSamyela wathi ebantwini: “Niyazi bonyana nguSomnini owakhetha uMosi bano-Aroni bewenyula naboyihlomkhulu eGibhide. ₇Yeke yizani emlandwini, ngizokufakazela uSomnini ngokutjho koke okuhle akwenza kini naboyihlomkhulu: ₈Emva kobana uJakopo nabantu bakhe bangene eGibhide, balilela uSomnini kobana abasize. USomnini wathumela uMosi no-Aroni abafika babakhupha aboyihlomkhulu eGibhide babahlalisa kilendawo. ₉Kodwana bakhohlwa uSomnini uZimabo, yeke wabanikela esandleni sakaSisera, induna yebutho lakaRhatsoro, nezandleni zamaFilista nekosini yakwaMowabi eyalwa nabo. ₁₀Balila kuSomnini bathi, ‘Sonile, satjhiya uSomnini sayokulotjha aboBhali nabosingazimukazi abo-Atjhitarothi. Kodwana yewusisindise esandleni sezitha zethu, yeke sizakulotjha.’ ₁₁Nje-ke uSomnini wathumela uJerubhali, uBhedani, uJafta nami Samyela, wanihlangula ezitheni zenu mahlangothi woke, yeke naphila nibulungekile. ₁₂Kodwana kwathi lokha nanibona uNarhatjhi ikosi yama-Amoni ijamelene nani, nathi kimi, ‘Awa, thina sifuna ikosi ezasibusa,’ nanyana uSomnini uZimu bekaseze ayikosenu nje. ₁₃Arha-ke, naso-ke ikosi enizikhethele yona nenithe niyayifuna; uSomnini uninikele ikosenu leyo. ₁₄Nanesaba uSomnini uZimu, nimlotjhe, nimlalele ningakhunyalali niphikisane nemithethwakhe begodu nimlandele nina nekosi enibusako, uSomnini uzakuba nguZimenu. ₁₅Kodwana naningalaleli uSomnini begodu nanikhunyalalako nijamelane nemithethwakhe, nizazizwa; isandla sakhe sizakuba phezu kwenu njengombana kwenzeka kiboyihlomkhulu. ₁₆Akhenijame-ke, umlandu awukapheli. Qalani bona kukhulu kangangani uSomnini azokwenza phambi kwenu: ₁₇Akusisikhathi sokuvuna ikoroyi lesi na? Ngizakubiza uSomnini kobana athumele umdumo nezulu. Yeke nizakulemuka bonyana yimbi kangangani into eniyenze phambi kwakaSomnini ngokuzibawela kwenu ikosi.”

₁₈Ngambala uSamyela wabiza uSomnini, khona mhlokho uSomnini wathumela umdumo nezulu. Boke abantu besaba khulu uSomnini noSamyela. ₁₉Boke abantu bathi kuSamyela: “Yewusirabhelela thina nceku zakho kuSomnini uZimakho; kobana singafi ngombana sithe sinezono, sazingezelela ngokuzibawela ikosi.” ₂₀USamyela waphendula wathi: “Ningesabi, vele; ukona khona nonile, kodwana ningamhlubuki uSomnini, mlotjheni ngeenhliziyo zenu zoke. ₂₁Ningaphendukeli kibosingazimu abanganabubhadekelo. Akunanto abanganisiza ngayo begodu angeze banisindisa ngombana abanabubhadekelo. ₂₂Ngebanga lebizo lakhe elikhulu uSomnini akazukubalahla abantu bakhe ngombana wakuthabela ukunenza bona nibe ngebakhe. ₂₃Mina angizukona phambi kwakaSomnini ngokubhalelwa kunirabhelela. Begodu ngizanifundisa indlela ehle nelungileko. ₂₄Yesabani uSomnini begodu nimlotjhe ngokwethembeka, ngeenhliziyo zenu ezipheleleko, nikhumbule izinto ezikulu anenzele zona. ₂₅Kodwana nanikhunyalalako nenza ubumbi, nina nekosenu nizazizwa, nizakutjhabalaliswa.”