1 KWEBEKORINTE 3

₁Eqinisweni bazalwana, bengingekhe ngakhuluma nani njengabantu bakaMoya, kodwana bengizakukhuluma nani njengabantu benyama, iye, abasesemasana kuKrestu. ₂Nganondla ngebisi, ingasi ngokudla okuqinileko ngombana beningakakulungeli. Iye, nanje anikakulungeli ₃ngombana nisesebabantu benyama. Ngitjho ngombana nakhu kusesekhona umona nokucabana phakathi kwenu. Anisibo benyama naninjalo na? Anikaziphathi njengabantu abangakakhetheki na? ₄Angithi omunye uthi: “Mina ngingewakaPowula.” Omunye athi: “Mina ngingewaka-Apholo.” Alo, anisibabantu abangakakhetheki naninjalo? ₅Ubegade ayini-ke u-Apholo loyo? UPowula yena uyini nje? Angithi sebaziinceku nje enakholwa ngazo kwaphela njengombana iKosi yabapha ngamunye umsebenzabo! ₆Mina ngatjala imbewu, u-Apholo wayisezela, kodwana nguZimu owayikhulisako. ₇Nje-ke bobabili, otjalako nosezelako abasililitho kodwana nguZimu yedwa okhulisako. ₈Umuntu otjalako nosezelako banomnqopho munye, omunye nomunye uzokuvuzwa ukuya ngokomsebenzakhe. ₉Thina sisebenza ndawonye singebakaZimu, nina niyisimu kaZimu begodu nimumakho kaZimu. ₁₀Ngomusa uZimu angiphe wona, ngabeka isisekelo njengomakhi onekghono, nje-ke kukhona othileko owakhela phezu kwaso. Kodwana omunye nomunye kumele ayelele bona wakha njani. ₁₁Ngitjho ngombana akekho omunye ongabeka isisekelo ngaphandle kwaloyo osele asibekile, okunguJesu Krestu. ₁₂Nakube kukhona umuntu owakha phezu kwesisekelwesi, asebenzise igolide, isiliva, amatje abizako, iingodo, utjani namkha iinhlanga, ₁₃umsebenzakhe uzokubonakaliswa ngalokho ongikho ngombana ilanga elikhethekileko lizowudalula. Uzokwambulwa ngomlilo begodu umlilo uzokuzizinya ubunjalo bomsebenzi womuntu. ₁₄Nangabe umsebenzi womuntu owakhelwe esisekelweni uyadzimelela, uzakwamukeliswa umvuzo. ₁₅Nakube uyatjha, uzakuloba; nokho yena ngokwakhe uzakusinda kodwana abe njengomuntu ophunyurhe emalangabini.

₁₆Kghani anazi bona nina nilithempeli lakaZimu nokobana uMoya kaZimu uhlala ngaphakathi kwenu na? ₁₇Loyo ochitha ithempeli lakaZimu, uZimu uzomchitha ngombana ithempeli lakaZimu licwengile.

₁₈Ningazikhohlisi. Nakube nanyana ngubani wenu udlumbana bona uhlakaniphile ngokwesilinganiso sesikhathesi, kumele abe sidlhadlha ukuze abe ngohlakaniphileko. ₁₉Ngitjho ngombana ukuhlakanipha kwephaseli kubudlhadlha phambi kwakaZimu ngombana kutloliwe kwathiwa: “Ubamba abahlakaniphileko ebuqilini babo.” ₂₀Umtlolo godu ubuye uthi: “USomnini uyazi bona imikhumbulo yabahlakaniphileko ililize.” ₂₁Yeke, akungasabakhona ukuzigqaja ngomuntu ngombana koke kungekwenu ₂₂nanyana kungaba nguPowula, u-Apholo, uKhefasi namkha iphasi, ukuphila, ukufa, isikhathi sanje namkha esizako; koke kungekwenu. ₂₃Kodwana nina ningebakaKrestu noKrestu ungewakaZimu.