Iimphiwo zokuphorofida nezamalimi
1Tjhisekelani ukuba nethando bese nirhuluphela iimphiwo zakaMoya, khulukhulu isiphiwo sokuphorofida. 2Loyo okhuluma ngamalimi akakhulumi nabantu kodwana ukhuluma noZimu. Akunamuntu omzwako; ukhuluma iimfihlakalo emmoyenakhe. 3Kodwana loyo ophorofidako ukhuluma nabantu ukuze baqine amandla, bakhuthazeke bebaduduzeke. 4Loyo okhuluma ngamalimi, uzakha yena emmoyeni, kodwana ophorofidako wakha ibandla.
5Ngithanda bona omunye nomunye wenu akhulume ngamalimi, kodwana kungcono bona niphorofide. Loyo ophorofidako mkhulu kunaloyo okhuluma ngamalimi, ngaphandle kwanange awarhumutjha ukuze ibandla lakheke. 6Nje-ke bazalwana, nange ngisiza kini ngifike ngikhulume ngamalimi, kuzonisiza ngani lokho na? Akunisizi ngalitho, ngaphandle kwanange nginilethela isambulo, ilwazi, isiphorofido namkha ilizwi lokuyala.
7Ngitjho nezintweni ezingaphiliko ezenza itjhada njengenghwani namkha iharibha, umuntu uzakwazi njani bona zilila ngayiphi indlela nakube akukho ukuhlukanisa ngomdumo na? 8Godu nakube iporompita ayizwakali kuhle bona ibiza abantu bonyana baye epini, ngubani ozazilungiselela ipi na? 9Ngokunjalo-ke nani, nakube anikhulumi okuzwakalako ngamalimi wenu, bazakuzwa njani abanye abantu bona nithini na? Nizabe nikhulumela emmoyeni. 10Kunamalimi okungazazeki bonyana manengi ephasinapha, kodwana akukho nalinye lawo elinganahlathululo. 11Nje-ke nakube angizwisisi okutjhiwo ngiloyo okhulumako, kutjho bona ngiliphandle kiloyo okhulumako, naye uliphandle kimi. 12Kunjalo nakini. Njengombana nitjhisekela ukwamukela iimphiwo zakaMoya nje, rhuluphelani khulu lezo ezakha ibandla.
13Ngalokho-ke nanyana ngubani okhuluma ngamalimi, kufanele athandaze bonyana akghone ukuhlathulula lokho akukhulumako. 14Ngitjho ngombana nangithandaza ngamalimi, kuthandaza ummoyami, kodwana umkhumbulwami awuhlanganyeli kilokho. 15Alo ngizakwenzanjani na? Ngizokuthandaza ngommoyami, ngithandaze nangomkhumbulwami, ngizokuvuma ngommoyami godu ngivume nangomkhumbulwami. 16Nakube udumisa uZimu ngommoyakho, angatjho njani loyo ozifunyana ahlangana nalabo abangazwisisiko ukuthi: “Amen” ekuthokozeni kwakho njengombana angazi bona uthini na? 17Kungenzeka bona uthokoze ngokwaneleko, kodwana omunye umuntu akakheki ngalokho.
18Ngiyamthokoza uZimu bona ngikhuluma ngamalimi ukunedlula noke nje. 19Kodwana nangisebandleni, ngikhetha ukukhuluma amezwi abe mahlanu azwisisekako ukuyala abanye, kunobana ngikhulume amezwi alitjhumi leenkulungwana ngelimi elingaziwako.
20Bazalwana, lisani ukucabanga njengabantwana. Iye, malungana nobumbi, yibani masana, kodwana nibe ngabakhulileko ngengqondo. 21Emthethweni kutloliwe kwathiwa:
“Ngabantu bamalimi atjhili
nangeembhena zamaphandle,
ngizokukhuluma nabantwaba
kodwana khonapho abazukungizwa.
Kutjho uSomnini.”
22Nje-ke amalimi alitshwayo kabangakholwako, ingasi kabakholwako; kodwana ukuphorofida kungokwabakholwako, ingasi abangakholwako.
23Yeke nakube ibandla loke liyahlangana bese woke umuntu ukhuluma ngamalimi, khonapho kungene abangazwisisiko namkha abangakholwako, abazukucabanga bona niyarhapha na? 24Kodwana nange ongakholwako namkha omunye ongazwisisiko, angena khibe woke umuntu uyaphorofida, boke bazamenza azibone asisoni begodu alahlwe ngunembeza 25bekuthi iimfihlo zehliziywakhe zivele etjhatjhalazini. Ngaleyondlela uzakuguqa phasi adumise uZimu arhuwelele athi: “Ngambala uZimu uphakathi kwenu.”
Ukulotjha okufaneleko
26Alo, sizakuthini bazalwana na? Lokha nanihlanganako, omunye nomunye akabe nerhubo, ilizwi lokufundisa, umbono, ilimi namkha irhumutjho lalo. Koke lokhu akwenzelwe ukuqiniswa kwebandla. 27Nakube kukhona ukukhuluma ngamalimi, akukhulume babili namkha babe bathathu batjhidelane, kuthi oyedwa arhumutjhe. 28Nakube akekho orhumutjhako, okhulumako loyo akathule ebandleni, akhulumele ngehliziyweni noZimu. 29Akukhulume abaphorofidi ababili namkha abathathu, abanye bahlolisise lokho okutjhiwoko. 30Nakube kufika isambulo kiloyo ohlezi phasi wokuthoma akathule 31ngombana ningaphorofida noke ngokudlhegana ukuze woke umuntu afunyane umlayezo kanye nokukhuthazwa. 32Imimoya yabaphorofidi ithobela abaphorofidi 33ngombana uZimu akasinguZimu wesiphithiphithi, kodwana ungowokuthula.
Njengakiwo woke amabandla wabacwengileko, 34abafazi abathule emabandleni. Abakavunyelwa ukukhuluma kodwana kufanele bazithobe njengombana kusitjho umthetho. 35Nakube kukhona abafuna ukukwazi, ababuze emadodeni wabo emakhaya ngombana kulihlazo bona umfazi akhulume ebandleni.
36Konjephana ilizwi lakaZimu livele ngani na? Namkha lifikelele nina kwaphela na? 37Nakube umuntu udlumbana bona umphorofidi namkha unesiphiwo sakaMoya, akamukele bona lokhu enginitlolela khona kumyalo weKosi. 38Nakuphayela eqadi lokhu, naye uzokuphayelwa eqadi.
39Ngalokho-ke bazalwana, tjhisekelani ukuphorofida, ningakuvimbeli ukukhuluma ngamalimi! 40Kodwana koke akwenziwe ngendlela efaneleko nehlelekileko.
