1 KWEBEKORINTE 11

₂Ngiyanibuka ngombana ningikhumbula ezintweni zoke begodu nibambelela eemfundisweni njengombana ngazidlulisela kini. ₃Kodwana ngifuna nazi bonyana ihloko yenye nenye indoda nguKrestu, ihloko yomfazi yindoda, kanti ihloko kaKrestu nguZimu. ₄Enye nenye indoda ethandaza namkha ephorofida igubuzese ihloko irhubutjha ihlokwayo. ₅Kodwana omunye nomunye umfazi othandaza namkha ophorofida angakagubuzesi ihloko urhubutjha ihlokwakhe, sekufana nalokha ihlokwakhe nayigudiweko. ₆Nangabe umfazi akagubuzesi ihlokwakhe, kumele agude begodu nakube kulihlazo kobana umfazi arhune namkha agude, kumele agubuzese ihlokwakhe. ₇Indoda ayikafaneli ukugubuzesa ihlokwayo ngombana imfanekiso nedumo lakaZimu; kodwana umfazi ulidumo lendoda. ₈Ngitjho ngombana indoda ayizange ivele emfazini kodwana mfazi owavela endodeni. ₉Indoda azange yadalelwa umfazi kodwana mfazi owadalelwa indoda. ₁₀Ngebangelo namkha ngebanga leengilozi umfazi kumele abe netshwayo lokuphathwa ehlokwakhe. ₁₁EKosini nokho umfazi akakazijameli ayedwa ngaphandle kwendoda, nendoda ayikazijameli iyodwa ngaphandle komfazi. ₁₂Njengombana umfazi wavela endodeni, ngokunjalo nendoda ibelethwa mfazi. Kodwana koke kubuya kuZimu.

₁₃Ziboneleni nina ngokwenu bona kufanele umfazi athandaze uZimu angakagubuzesi ihlokwakhe na? ₁₄Imvelo ngokwayo ayinifundisi bonyana nakube indoda ineenhluthu ezide kulihlazo kiyo, ₁₅kodwana umfazi naneenhluthu ezide kulidumo kuye na? Uphiwe iinhluthu ezide bona zibe sisembeso sakhe. ₁₆Nakube ukhona ofuna ukuphika ikani ngalokhu, asinawo omunye umkhuba onjalo thina kanye namabandla akuZimu.

₁₇Emiyalweni elandelako, anginakho ukunibonga ngombana imihlangano yenu ibanga umonakalo kunobana ibange ubuhle. ₁₈Kokuthoma nje ngizwa batjho nanihlanganako njengebandla, kuba khona ukuhlukana phakathi kwenu, begodu ngithanda ukukukholwa lokho. ₁₉Kufanele kube khona ukuhlukana phakathi kwenu ukuze kubonakale bona ngibaphi abaneqiniso. ₂₀Lokha nanihlanganako, kusuke kungasiso isidlo seKosi enisigomako ₂₁ngombana nanigomako, omunye nomunye wenu uragela phambili agome ngaphandle kokulindela abanye. Omunye uhlala alambile kanti omunye uyadakwa. ₂₂Kanti aninamakhaya lapha ningagomela beniselele khona na? Namkha ninyaza ibandla lakaZimu benirhubutjhe labo abanganalitho na? Ngizakuthini kini na? Nginibuke ngalokho na? Nakanye!

₂₃Ngakwamukela eKosini lokho engikudlulisela kini kokuthi: IKosi uJesu ngobusuku eyakhatjhelwa ngabo, yathatha isikwa, ₂₄kwathi sele ithokozile kuZimu, yasihlephula yathi: “Lokhu mzimba wami onikelwe nina, kwenzeni lokhu ukuze ningikhumbule.” ₂₅Ngokunjalo, ngemva kobana sele bagomile, yabuye yathatha ikapho yathi: “Ikapho le isivumelwano esitjha eengazini zami. Kwenzeni lokhu njalo lokha naniyiselako ukuze ningikhumbule.”

₂₆Yeke njalo lokha nanigoma isikwa lesi benisele nekapho le, nimemezela ukufa kweKosi kufikela beyibuye. ₂₇Ngalokho-ke loyo ogoma isikwa lesi namkha asele ikapho yeKosi ngokungakafaneli, uzakuba nomlandu wokona emzimbeni kanye neengazini zeKosi. ₂₈Umuntu kumele azihlolisise ngaphambi kobana agome isikwa abe asele nekapho. ₂₉Loyo ogomako abe asele ngaphandle kokuhlukanisa umzimba weKosi, uzigomela abe aziselele umlandu. ₃₀Kungebangelo abanengi phakathi kwenu babuthakathaka begodu bayagula kanti inengi lenu sele lilele. ₃₁Kodwana nakube besizigweba thina, besingeze sagwetjwa. ₃₂Nasigwetjwa yiKosi, siyakhalinywa ukuze singalahlwa kanye nephasi.

₃₃Ngalokho-ke bazalwana, lokha nanihlanganako kobana nigome, lindanani. ₃₄Nakube kukhona olambileko, akagome ekhaya ukuze kuthi nanihlanganako kungabi ngokokugwetjwa.

Mhla ngibuyako ngizaninikela eminye imiyalo.