1 IINKRONIKE 22

₂Yeke uDavida walayela bonyana kubizwe iinkhonzi egade zisenarheni yakwa-Israyeli. Wazikhetha bonyana zibe bacozi bamatje ukuze zilungise amatje abaziweko ukwenzela bona kwakhiwe ithempeli lakaZimu. ₃Waletha isimbi enengi bona kwenziwe iinkhonkhwani zesango neenghamelo, kanye nekoporo enengi enobudisi obungalinganisekiko. ₄Godu waletha iingodo zomsedari ezingangobaba ezathulwa maTsidoni namaTirosi ngobunengi kuDavida. ₅UDavida wenza lokhu ngombana wadlumbana wathi: “Indodanami uSolomoni isakhula begodu isengakabi nelizwi. Ithempeli elizakwakhelwa uSomnini kufuze libabazeke ngobukhulu libe nedumo belikarise emehlweni wezizwe. Yeke ngimi ozakwenza amalungiselelo walo.”

Ngalokho uDavida wancama wabhinca ngaphambi kobana ahlongakale. ₆Nje-ke uDavida wabiza indodanakhe uSolomoni wayiyala bona yakhele uSomnini uZimu wakwa-Israyeli ithempeli, ₇wathi: “Ndodanami, uyazi bekusehliziywenami bonyana ngakhe ithempeli ebizweni lakaSomnini uZimami. ₈Kodwana kufike nanti ilizwi lakaSomnini lathi, ‘Wena sewuthulule iingazi ezinengi ephasini phambi kwami begodu izipi ozilwileko zinengi khulu. Ngebangelo awuzukwakha ithempeli ebizweni lami. ₉Ngalokho uzakubeletha indodana; yona izakuba yindoda yokuthula ngombana ngizayinikela ukuphumula kizo zoke izitha zayo mahlangothi woke. Iye ibizo layo kuzakuba nguSolomoni, ngombana emihlenakhe ngizakwehlisela ukuthula nokuzotha phezu kwaka-Israyeli. ₁₀Nguye-ke ozakwakha ithempeli ebizweni lami. Yena uzakuba yindodana kimi, mina ngibe nguyise kuye. Begodu ngizakunzinzisa ubukhosi bombuswakhe phezu kwaka-Israyeli isiphelani.’ ₁₁Nje-ke ndodanami, inga uSomnini angaba nawe ukuze uphumelele wakhe indlu kaSomnini uZimakho njengokutjho kwakhe. ₁₂Kwanga uSomnini angakupha ukuhlakanipha nokuzwisisa lokha nakakubeka bona wengamele u-Israyeli ukuze uphethe umthetho kaSomnini uZimakho. ₁₃Nawuphetha iimiso nemithetho kaSomnini ayinikela uMosi ngebanga lama-Israyeli, uzakuba nepumelelo. Qina, ungapheli amandla; ungabi nevalo wesabe ukuragela phambili. ₁₄Qala, ngithwele boke ubunzima kobana ngibonelele ithempeli lakaSomnini ngamakhilogremu aziingidi ezintathu namakhulu amane namatjhumi amabili nekhomba weenkulungwana zegolide, ngamakhilogremu aziingidi ezimatjhumi amathathu nane namakhulu amabili namatjhumi alikhomba weenkulungwana zesiliva, nangomhlumba wekoporo nesimbi enengi engalinganisekiko. Godu ngibonelele ngeengodo kanye namatje. Nawe-ke kufuze ungezelele kilokhu. _15-16Unamadoda amanengi ongawasebenzisa: abacozi bamatje, abakhi ngamatje, abafuleli kanye nenengi labososino bemihlobohlobo yemisebenzi yegolide, yesiliva, yekoporo nesimbi. Nje-ke thoma umsebenzi, uSomnini uzakuba nawe.”

₁₇Yeke uDavida wayala boke abarholi bakwa-Israyeli bona basize indodanakhe uSolomoni, ₁₈wathi: “USomnini uZimenu unani ngombana uninikele ukuphumula mahlangothi woke. Iye, unikele izakhamuzi zendawo le esandleni sami, nje-ke abantu benarha le baseenyaweni zakaSomnini nabantu bakhe. ₁₉Yeke funani uSomnini uZimenu ngeenhliziyo nangemiphefumulwenu. Thomani ngokwakha indawo ecwengileko kaSomnini uZimu ukuze kulethwe umfaji wesivumelwano sakaSomnini neentlabagelo ezikhethekileko zakaZimu ngethempelini elizabe lakhelwe ibizo lakaSomnini.”