SAKARIA 8

₁Lentšu la Morena wa mašaba la ntlela la re: ₂Morena wa mašaba o re: Tsione ke be ke go pelofalela ke go swela pelo; ka go pelofalela wa go galefa gagolo. ₃Morena wa mašaba o re: Ke boela Tsione; ke aga motseng wa Jerusalema. Jerusalema go tlo bitšwa motse wa therešo; thaba ya Morena wa mašaba e tlo bitšwa Thabakgethwa. ₄Morena wa mašaba o re: Mo mekgobeng ya Jerusalema go sa tlo dula bakgalabje le bakgekolo ba swere mahlotlo ka boati bja matšatši. ₅Mo mapatlelong a motse go tlo tlala bašemane le banana, ba bapala mo mapatlelong a wona.

₆Morena wa mašaba o re: Ge mašalela a setšhaba se a ka re: Tše bjalo a di sa tlo kgonega mehleng ya bjalo, a ke gore le nna ke bona di sa kgonege? O realo Morena wa mašaba. ₇Morena wa mašaba o re: Ke nna e, Mophološatšhabasaka nageng ya bohlabela le ya bodikela. ₈Ke tlo ba goroša; ba tlo dula fa Jerusalema; e tlo ba setšhaba sa ka, mme nna ke tlo ba Modimo wa bona ka therešo le ka toko.

₉Morena wa mašaba o re: A diatla tša lena di tie maatla, lena ba le kwago mehleng yeno ditaba di bolelwa ke baporofeta ba mohla wola go sa thewa Ngwako wo wa Morena wa mašaba, gore Ntlokgethwa e agiwe. ₁₀Ka gobane mehleng e fetilego modiro wa motho o be o sa tšwe selo; le modiro wa seruiwa o be a sa hole selo; e a bego a etšwa le e a bego a boa, o be a sa atlege, go le manaba; ka gobane ke be ke lesitše batho bohle, motho a lwa le wa gabo. ₁₁Fela bjale mašalela a setšhaba se nka se ke ka a dira tša mehla yela ya kgale. O realo Morena wa mašaba. ₁₂Go tlo ba le peu ya molao; morara o tlo bea dikenyo; naga e tlo ntšha menono; legodimo le tlo neša phoka ya lona. Tšeo ka moka ke tlo di nea mašalela a setšhaba se, ya ba tša bona. ₁₃Tše di tlo go ba gona šedi: Bjalo ka ge lena ba moloko wa Juda le wa Isiraele le le ba go rogwa ke ditšhaba, ke tlo le phološa la ba ba go šegofatšwa. Se boifeng! Dirang ka maatla.

₁₄Gobane Morena wa mašaba o re: Bjalo ka ge nkile ka akanya go le hlokofatša mola botataweno ba mpefetše, ke se thiše. ₁₅Bjale ke boile; mehleng yeno ke eleletša go ka šetša motse wa Jerusalema le ba moloko wa Juda. Le se boifeng! ₁₆Tše le swanetšego go di dira šedi: Botšanang therešo, le rereše kahlolong; go dikgorong tša lena go buše therešo le toko le molao. ₁₇Motho a se ke a gopola wa gabo ka tše mpe; le se ke la rata keno ya maaka; ka gobane ke tšona tše nna ke di hloilego. O realo Morena.

₁₈Lentšu la Morena wa mašaba la ntlela la re: ₁₉Morena wa mašaba o re: Tša mola ba moloko wa Juda ba ikona ka kgwedi ya bone le ka ya bohlano le ka ya go šupa le ka ya lesome, di tlo fetoga thabo le tlhalalo le menyanya e mebotse. Ratang, gee, therešo le molao.

₂₀Morena wa mašaba o re: Go sa tlo tla ditšhaba le baagi ba metse e mentši. ₂₁Baagi ba motse o mongwe ba tlo ya go baagi ba o mongwe motse, ba re: A re yeng, re yo rapela sefahlogo sa Morena, re nyake Morena wa mašaba; le rena re a ya. ₂₂Go tlo tla ditšhaba tše ntši, ditšhaba tše maatla, tša nyaka Morena wa mašaba motseng wa Jerusalema, tša rapela sefahlogo sa Morena. ₂₃Morena wa mašaba o re: Mehleng yeo banna ba lesome ba mebolelo ya mehutahuta ba tlo swara monna wa Mojuda ka kobo, ba re: A nke re ye le lena, ka gobane re kwele gore Modimo o na le lena.