SAKARIA 4

₁Gwa boa Morongwa yola a bego a bolela le nna, a ntsoša bjalo ka ge motho a tsošwa borokong. ₂A mpotšiša a re: O bonang?

Nna ka re: Ke bona sehlomapone; ke sa gauta ka moka ga sona; le sebjana sa makhura se ka godimo ga sona; se na le dipone tše di šupago; le dihlaka tše di šupago tša go iša makhura diponeng a etšwa sebjaneng. ₃Ka bona mehlware e mebedi e le hleng ga sona; o mongwe o le ka lehlakoreng le letona, o mongwe o le go la ntsogošo. ₄Ka botšiša Morongwa e a bego a bolela le nna, ka re: Mong a ka! Tšeo ke eng?

₅Morongwa eo a fetola a re: Anthe dilo tšeo ga o tsebe se di lego sona?

Nna ka re: Aowa, Mong a ka.

₆Yena a re: Sele lentšu la Morena le ela Serubabele, le re: E ka se be ka dira; e ka se be ka maatla; e tlo ba ka Moya wa ka! -- O realo Morena wa mašaba. ₇O eng? Wena thabakgolo! Pele ga Serubabele o tlo ba molala. Go tlo ba gwa bewa leswika la sehlwa, gwa goeletšwa gwa thwe: A le atlege! A le atlege!

₈Lentšu la Morena la boela la ntlela la re: ₉Ntlo ye e theilwe ke diatla tša Serubabele; mme e tlo ba ya phethwa ke diatla tša gagwe. Ke mo le tlogo tseba ge ke romilwe ke Morena wa mašaba. ₁₀Ka gobane le e a nyaditšego mehla yeno ya dilo tše nyenyane o tlo thaba ge a bona leswika la sehlwa le le diatleng tša Serubabele.

Mahlo ala a šupago (Sak. 3:9) ke mahlo a Morena a a bonago tša lefase ka moka.

₁₁Nna ka botšiša ka re: Mehlware e mebedi yeo e lego lehlakoreng le letona le go la ntsogošo la sehlomapone, ke ya eng? ₁₂Ka buša ka mmotšiša ka re: Makala a mabedi ao a mohlware, a bataganego le dipone tša gauta, a go tšhologa makhura a bohlokwa, ke a eng?

₁₃Yena a fetola a re: A ga o tsebe se a lego sona?

Nna ka re: Aowa Mong a ka. ₁₄Yena a re: Ke bona batlotšwa ba babedi, ba e lego bahlanka ba Mong a lefase lohle.