SAKARIA 1

₁Ka kgwedi ya seswai ya ngwaga wa bobedi wa Dario, moporofeta Sakaria morwa wa Berekia morwa wa Ido, o tletšwe ke lentšu la Morena la re: ₂Morena, botataweno o be a ba galefetše ruri. ₃Bjale bolela le bona o re: Boelang go nna! -- O realo Morena wa mašaba. -- Ke mo le nna ke tlogo boela go lena! -- O realo Morena wa mašaba. -- ₄Le se ke la etša botataweno, ba ba bego ba bitšwa ke baporofeta ba thwe; Morena wa mašaba o re: Lahlang ditsela tše mpe tša lena, le mediro e mebe ya lena! Mme bona ba se kwe; ba se theetše ge ke bolela! -- O realo Morena. ₅Ba kae, botataweno? Le baporofeta, a le bona ba phela ka go sa felego? ₆Gomme tše ke bego ke di bolela ke laetša bahlanka ba ka ba baporofeta, a ga tša ka tša tlela botataweno? Ba boa ba tla ba re: Tše Morena wa mašaba a gopotšego go re dira tšona ka mo go loketšego ditsela tša rena, o re dirile tšona.

₇Ka tšatši la masome a mabedi a metšo e mene la kgwedi ya lesome la motšo o tee, e lego kgwedi ya Sebate, ka ngwaga wa bobedi wa Dario, moporofeta Sakaria morwa wa Berekia a tlelwa ke lentšu la Morena, la re: ₈Bošego bjo ke bone monna e a nametšego pitsi e khulong, a eme gare ga dihlare tša mehlakolane; ka morago ga gagwe go be go eme dipitsi tše dingwe tše khulong le tše phifadu le tše tšhweu. ₉Nna ka re: Mong wa ka, ke bomang bao?

Morongwa e a bego a bolela le nna a re: Ke tlo go bontšha se ba lego sona. ₁₀Gwa bolela monna yola e a bego a eme gare ga mehlakolane, a re: Ke bona ba Morena a ba romilego go ralala lefase.

₁₁Banna bao ba anegela Morongwa wa Morena e a bego a eme gare ga mehlakolane, ba re: Re raletše lefase, ra hwetša lefase ka moka le letše le iketlile.

₁₂Morongwa wa Morena a fetola a re: Morena wa mašaba! Di tlo fela neng tše tša go se gaugele motse wa Jerusalema le metse ya Juda, ye o feditšego nywaga e masome a šupago o e befeletšwe?

₁₃Morena a fetola, a bolela le Morongwa e a bego a bolela le nna, a mmotša mantšu a botho, mantšu a go mmea pelo. ₁₄Morongwa e a bego a bolela le nna a nthera a re: Hlaboša lentšu o re: Morena wa mašaba o re: Motse wa Jerusalema le Tsione ke o pelofaletše gagologolo. ₁₅Ditšhaba tše di bego di dutše di iketlile ke di galefela ka kgalefo e kgolo; ka gobane mola ke befetšwe ka gonyane, tšona tša iša taba bobeng. ₁₆Bjale Morena o re: Ke boela Jerusalema ka dikgaugelo; Ntlo ya ka e tlo agiwa gona. -- O realo Morena wa mašaba. -- Motse wa Jerusalema a o ngangelwe lenti la baagi.

₁₇Goeletša gape o re: Morena wa mašaba o re: Metse ya ka e tlo boela e tlala tše botse. Morena o sa tlo homotša Tsione, o sa tlo šetša motse wa Jerusalema.