SEFELA SA DIFELA 3

₁Bošego, ke le dilaong ke hlologelwa yo pelo ya ka e mo ratago; ke mo hlologelwa ke sa mmone.

₂Ka re: A nke ke tsoge ke putle le motse le mekgotha le mapatlelong, ke mo nyake, yena yo pelo ya ka e mo ratago; ka mo nyaka ka se ke ka mmona.

₃Ka bonwa ke baleti ba go sepela le motse. Ka re: A le mmone, yo pelo ya ka e mo ratago?

₄Ya re ke sa tšo ba feta, ka mo hwetša, yena yoo pelo ya ka e mo ratago. Ka mo swara, ka se sa mo lesa; ka mo iša go mme lapeng, ngwakong wa montswadi.

₅Hee lena barwedi ba Jerusalema! Ke le eniša ka ditshepe le diphala tša nageng, ke re: Lerato le se mo phafoše, a be a tsoge ka noši.

₆Ke eng seo se tšwago šokeng sekakuelele ya meuši? Sa monko wa ditlolo le wa diorelo le wa mere ya mehutahuta ya bašabi?

₇Ke leako la Salomo, le šikwa ke banna ba masome a a selelago ba bagale ba Isiraele.

₈Ka moka ba swere tšhoša, ba feletše marumong; monna o itlemeletše mphaka lethekeng; ba šia tša bošego.

₉Kgoši Salomo o itiretše leako ka phata tša Libanoni.

₁₀Dihlakore tša lona ke tša tshipitshehla, hlaka ke ya tshipi e khwibidu; mosamelo ke wa moretele; ka gare ke matsaka a lerato la barwedi ba Jerusalema.

₁₁Hee lena barwedi ba Tsione, tšwang le bone morena Salomo; o rwele mphapahlogo wo mmagwe a mo rwešitšego wona ka tšatši la gagwe la lenyalo, ka tšatši la lethabo la pelo ya gagwe.