Naomi o boela Betlehema a na le Ruthe
1Mehleng ya ge go buša baahlodi go kile gwa wa tlala nageng. Monna e mongwe a khuduga motseng wa Betlehema wa la Juda, a yo diilela nageng ya Moaba a na le mosadi wa gagwe le barwa ba gagwe ba babedi. 2Leina la monna eo e be e le Elimeleke, la mosadi e be e le Naomi; barwa ba gagwe e be e le Mahlone le Kileoni, ba motse wa Betlehema wa la Juda; ba tla nageng ya Moaba ba dula ntshe. 3Gomme Elimeleke monna wa Naomi a hwa; Naomi a šala le barwa ba babedi ba gagwe. 4Bona bao ba tšea basadi ba ga Moaba. Leina la e mongwe e be e le Oropa; la e mongwe e be e le Ruthe. Ba dula ntshe, gwa nyako fela nywaga e lesome. 5Mahlone le Kileone le bona ba hwa; mosadi yoo a dula a šiilwe ke barwa ba babedi ba gagwe le monna wa gagwe.
6Ke mo a tsogilego a na le betši ba gagwe, a tloga moo nageng ya Moaba a leba gae; ka gobane a le gona moo nageng ya Moaba, o be a kwile gobane Morena o atile setšhaba sa gabo a se fa bogobe. 7A tloga felo moo a bego a dutše gona a na le betši ba babedi ba gagwe, a wela tsela ya go boela nageng ya Juda. 8Naomi a bolela le betši ba babedi ba gagwe a re: Bjale gomang hle, le boeleng malapeng a bommaweno. A Morena a le dire ka botho, ka mo le dirilego bala ba ba hwilego, le nna la ntira ka botho. 9A Morena a le thuše gore le be le hwetše makhutšo a mosadi ge a na le monna lapeng. A realo a ba atla, gomme ba hlaboša mantšu ba lla. 10Ba fetola ba re: Aowaa, re ya nago ge o boela setšhabeng sa geno.
11Naomi a re: A nke le gomeng, bana ba ka; le tla ba le elang le nna? A le re ke sa tlo belega barwa ba e tlogo ba banna ba lena? 12Gomang, bana ba ka, le boeleng gae. Nna ke godile gomme nka se hlwe ke tšewa. Le gona ge nka re ke sa tlo tšewa bošego bjo ka tloga ke belega barwa, 13a le ka ba letela ba ba ba gola? A le ka fo itulela le sa tšewe? Aowaa, go se be bjalo, bana ba ka. Ka go kwela lena bohloko e ba mo ke kwago seatla sa Morena se nkimela.
14Ba buša ba hlaboša mantšu ba lla; Oropa a laelana le Naomi; Ruthe a šala a mo gomaretše. 15Naomi a re: Šeo ngwaneno o boela setšhabeng sa gabo; le wena ako boele gae le ngwaneno.
16Ruthe a re: Ako se nkotelele wa re ke go tlogele ke gome ke se na nago; ka gobane mo o yago, le nna ke ya gona; mo o dulago, le nna ke tlo dula gona; setšhaba sa geno ke tlo re ke sa gešo; Modimo wa gago e tlo ba Modimo wa ka; 17mo o hwago, le nna ke tlo hwela gona ka bolokwa gona; Morena a a ntire ka mo a ratago; se se tlogo nkaroganya le wena ke lehu fela.
18Bjale Naomi ge a bona gore o tiišitše go sepela nae, a lesa go bolela le yena ka mokgwa woo.
19Ba sepela e le ba babedi, ba ba ba fihla Betlehema. Ya re ge ba tsena, motse ka moka wa huduega ka baka la bona, ba re: A ke yena Naomi?
20Yena a fetola a re: Lesang go mpitša ka la Naomi; a nke le re Mara, ka gobane Yomaatlakamoka o ntirile tše di galakago ruri. 21Ke tlogile ke humile; bjale Morena o mpušetša gae ke le fela. Le reng le sa mpitša ka la Naomi ke lahlilwe ke Morena, ke hlokofaditšwe ke Yomaatlakamoka?
22Ke tšona tša go goroga ga Naomi a na le Ruthe mosadi wa ga Moaba ngwetši wa gagwe, mola ba etšwa nageng ya Moaba. Fa Betlehema ba fihlile ge ba thoma go buna mabele.
