BAROMA 2

₁Šedio ge, wena motho, le ge o ka ba mang, wena o ahlolago tša ba bangwe, ga o na mo o kago phema; gobane ge o ahlola tša e mongwe, e ba go ipea molato, ka ge le wena o dira tše o di solago. ₂Gomme re tseba gore kahlolo ya Modimo, ba ba dirago tše mpe tšeo, e tlo ba tlela ka therešo. ₃Bjale wena motho, a o re ge o sola ba ba di dirago, mme le wena wa di dira, a o re o tlo phonyokga kahlolo ya Modimo? ₄A o nyatša bogolo bja botho bja Modimo, le bja go se fele pelo, le bja kgotlelelo ya gagwe? A ga o tsebe ge botho bja Modimo bo go otelela go itšhola? ₅Tseba gore ka go thatafala ga gago, le ka go se itshole, o ikobela bogolo bja bogale bja mohla wa bogale, ge go tlo bonagala kahlolothereši ya Modimo. ₆Ke yena a tlogo nea bohle se se lebanego mediro ya bona. ₇Ba ba kgotleletšego go dira tše botse, ba nyaka letago le tumišo le tše di sa senyegego, bona o tlo ba nea bophela bjo bo sa felego. ₈Ba ba ganago, ba se kwe therešo, ba ya ba kwana le bokgopo, ba tlo bona pefelo le bogale. ₉Tše di tlogo wela moya wa motho mang le mang e a dirago bobe ke ditlaišego le tlalelo, tša tlo thoma ka Mojuda, tša tlo wela le Mogerika. ₁₀Tše di tlogo tlela mang le mang e a dirago botse, ke letago, le tumišo, le khutšo; tša tlo thoma ka Mojuda, tša tlo tlela le Mogerika. ₁₁Gobane Modimo ga a bebe difahlogo.

₁₂Ba ba dirilego dibe go se na Molao, ba tlo lahlega go se Molao. Ba ba dirilego dibe ba na le Molao, ba tlo ahlolwa ka wona Molao. ₁₃Ba ba lokago pele ga Modimo ga se bao ba go kwa Molao ka ditsebe; ba go tlo thwe ba lokile ke badiri ba Molao. ₁₄Gobane bantle ba ba se nago Molao wo, ge ka noši ba dira tše di bolelwago ke wona Molao, ke go re mo go bona Molao o gona, le ge ba se ba wona Molao. Molao wa bona ke bona beng; ₁₅ba šupetša gore mo dipelong tša bona go ngwadilwe se Molao o ratago ge se dirwa; matswalo a bona a ba hlatsela gotee le megopolo ge e begana, le ge e emelana. ₁₆Di tlo bonala mohla Modimo a tlogo ahlola dithopa tša batho ka Jesu Kriste. E reyalo Ebangedi ya ka.

₁₇Bjale ge o re o Mojuda, o ipata ka Molao, wa kgantšha Modimo; ₁₈o tseba thato ya Modimo, o hlaologanya se e lego tabataba, gobane o rutilwe Molao; ₁₉o itira mosepediši wa difofu; o re: Ke seetša sa ba lego leswiswing; ₂₀o re: Ke moeletši wa ba ba sa tsebego, ke moruti wa ba e lego bana, ka ge o swere yona tsebo le therešo e paala ka Molao. ₂₁Bjale wena, o rutago ba bangwe, o reng o sa ithute? ₂₂O iletša go utswa, wa tla wa utswa. O iletša go otswa, wa tla wa otswa. O hlaswa medimo ya diswantšho, wa tla wa thopa tša nywakong ya medimo. ₂₃O kgantšha Molao, wa tla wa goboša Modimo ka go senya Molao. ₂₄Gobane go ngwadilwe gwa thwe: Ina la ka le hlwa le goboga ka bolena mo go bantle.

₂₅Ge o le Mojuda ka lebollo, o tla holega ge o dira Molao; fela, ge o senya Molao, gona lebollo la gago e ba go se bolle. ₂₆Ge motho e a sa kago a bolla, a ka loka ka go ya ka Molao, go se bolle ga gagwe a go ka mo thibela go bapetšwa le Mojuda wa lebollo? ₂₇Yena eo a tswetšwego e se Mojuda wa lebollo, ge a phetha tše di boletšwego ke Molao, o tlo sekiša wena o senyago Molao mola o na le lengwalo la Molao. ₂₈Gobane Mojudajuda ga se eo wa lebopo; lebollo ga se leswao leo la go bonala mmeleng; ₂₉Mojudajuda ke wa teng; lebollobollo ke la pelo, ke tiro ya Moya; ga se go fo ya le lengwalo; ga se go retwa ke batho; ke go retwa ke Modimo.