BAROMA 12

₁Bjale lena bana bešo, ke a le rapela ka go bona mabobo a Modimo, ke re: Tlišang mebele ya lena, e be sedimo se se phelago, se sekgethwa, sa go kgahla Modimo; e be gona go direla Modimo ka mo go swanetšego. ₂Le se ke la ipapetša le ba mehla yeno; šatogang ka go mpshafala kgopolo, gore le tle le hlaologanye se e lego thato ya Modimo, e lego se botse le se se kgahlišago, se e lego sa botlalo.

₃Gobane, ge ke bona kgaugelo ye e ntiregetšego, ke botša lena bohle ke re: Go se ke gwa ba le e a itshemago a fetiša moo go mo swanetšego. Itshemeng ka go ya ka kelelo; mang le mang a ye ka mo Modimo a mo lekanyeditšego tumelo. ₄Gobane re etša mmele o nago le ditho tše ntši e le mmele o tee, mme ditho di se na modiro o tee ka moka ga tšona. ₅Re mmele o tee ka Kriste, gomme seng sa rena e mongwe ke setho sa e mongwe. ₆Re ba ba filwego dineo tše di sa swanego; di ya ka kgaugelo ye re e neilwego. ₇Ge e le boboledi, a bo ye ka go amana le tumelo; ge e le bodiredi, e be go direla ba bangwe; ge e le moruti, a ye yona thuto. ₈Ge e le moeletši, a tiiše gona go eletša; wa go ntšha dimpho a dire a se na bomenetša; e a laolago a dire ka phišego; mogaugedi a dire a thabile.

₉Lerato le se ke la ikgantšha; le be ba ba hloilego bobe, le gomarele bolo. ₁₀Go ratana seng sa lena e be kwano ya dipelo; le rakene pele ka go godišana. ₁₁Mafolofolo a a ye le go se fele pelo; phišego a e be ya Moyeng; le hlankele Morena. ₁₂Thabang kholofelong; kgotlelelang tlaišegong; tiišang thapelo. ₁₃Bakgethwa ge ba hloka le ba kwele bohloko; go setša baeti e be mokgwa wa lena.

₁₄Ba ba le tlaišago le ba šegofatše. Le šegofatše, le se ke la roga. ₁₅Thabang le ba ba thabilego; le lle le ba ba llago. ₁₆Le be ba pelotee seng sa lena; le se ke la nyaka tša bogolo; le tlwaelane le babotlana.

₁₇Le se ke la itira babatabohlale. Le se ke la lefetša motho bobe ka bobe. A batho bohle ba le bone le le ba go bata bolo. ₁₈Ge go kgonega ka thoko ya lena, le phedišane gabotse le batho ka moka. ₁₉Baratwa baka! Le se ke la itefeletša; šuthelang bogale bja Modimo; gobane go ngwadilwe gwa thwe: Tefetšo ke ya ka, le kotlo ke yaka, o ryalo Morena. ₂₀Ke gona, naba la gago le na le tlala, le fe dijo, le nyorilwe, le fe meetse le nwe. Ke mo o tlogo gokolela magala mo hlogong ya lona. ₂₁Se fenywe ke bobe; bobe bo fenye ka bolo.