KUTOLLO 5

₁Ka bona seatleng se setona sa eo a dutšego sedulong sa bogoši go le lengwalo le le ngwadilwego ka teng le ka ntle, le le tlemilwego ka mahuto a šupago. ₂Ka bona Morongwa wa maatla a goelela ka lentšu le legolo a re: Ke mang a loketšwego ke go bula lengwalo le, le go kgaola mahuto a lona? ₃Mme legodimong, le mo lefaseng, le tlase ga lefase, go be go se e a kgonago go bula lengwalo leo le go le bona. ₄Nna ka lla gagolo, ge go hlokwa e a swanetšwego ke go bula lengwalo leo le go le bona. ₅E mongwe wa bagolo a bolela le nna a re: Se lle. Tseba gore go fentše Tau ya loko la Juda, Lehlogedi la modu wa Dafida, gore a bule lengwalo leo, a kgaole mahuto a lona a šupago.

₆Ka bona mo gare ga sedulo sa bogoši, le gare ga diphedi tše nne le magare a bagolo go eme Kwana ye e kego e hlabilwe, e na le dinaka tše šupago le mahlo a šupago, e lego Meoya e šupago ya Modimo, ye e rometšwego lefaseng ka moka. ₇Yona Kwana ya tla ya tšea lengwalo seatleng sa eo a dutšego sedulong sa bogoši. ₈Kwana ge e tšea lengwalo leo, diphedi tše nne le bagolo ba masome a mabedi le metšo e mene, ba lotšha Kwana, e mongwe le e mongwe a swere seletšo le moruswi wa gauta o tletšego diorelo; ke dithapelo tša bakgethwa. ₉Ba opela sefela se sefsa, ba re: Di go swanetše, ge o tšea lengwalo wa kgaola mahuto a lona; gobane o hlabilwe mme go ba meloko yohle le maleme ohle le ditšhaba tšohle le go Bantle bohle, o na le ba o ba reketšego Modimo ka madi a gago, ₁₀wa ba dira magoši le baperisita ba Modimo wa rena; mme ba tlo buša mo lefaseng.

₁₁Ka lebelela, ka kwa mogoo wa Barongwa ba bantši ba ba dikaneditšego sedulo sa bogoši le diphedi tšeo le bagolo bao; palo ya bona e le kgoloborethe le diketekete. ₁₂Ba hlaboša mantšu ba re: Kwana ye e hlabilwego e loketše go tšea maatla le lehumo le bohlale le go kgona le go godišwa le go retwa le go lebogwa. ₁₃Ka kwa dibopša tšohle tša legodimong le lefaseng, le tša tlase ga lefase le lewatleng, tšohle tše di lego madulong ao, ka di kwa di re: Go eo a dutšego sedulong sa bogoši, le go Kwana a go išwe tebogo le kgodišo, le theto le maatla go iša mehleng ya neng le neng. ₁₄Diphedi tše nne tšela tša re: Amene! Bagolo bala ba masome a mabedi a metšo e mene ba lotšha ba khunamela eo wa go phela go iša mehleng ya neng le neng.