Noka ya meetse a bophelo. Dikeletšo le malaeledi
1A ntšhupetša noka ye e sekilego ya meetse a bophelo, e phadimago boka legakabje le le bonatšago, e tšwa go sedulong sa bogoši sa Modimo le sa Kwana. 2Mo mekgotheng ya gona, ka mošono le mošola wa noka, go sehlare sa bophelo sa go enywa dienywa tše lesome la metšo e mebedi; se enywa dienywa ka kgwedi e nngwe le e nngwe. Mme matlakala a sehlare seo ke a go fodiša ditšhaba. 3Go ka se ke gwa ba le sehlolakotsi sefe le sefe.
Sedulo sa bogoši sa Modimo le sa Kwana se tlo ba moo; mme bahlanka ba gagwe ba tlo mo hlankela. 4Ba tlo bona sefahlogo sa gagwe, mme leina la gagwe le tlo ba le le diphatleng tša bona. 5Go ka se ke gwa ba le bošego, go ka se hlokwe lebone le seetša sa letšatši, gobane Morena Modimo o tlo ba ediša, mme ba tlo buša go iša mehleng ya neng le neng.
6A bolela le nna a re: Ditaba tše di a botega, ke tša go rereša. Morena Modimo wa meoya ya Baporofeta o romile morongwa wa gagwe, a bontšha bahlanka ba gagwe tša go tlo direga ka bjako.
7Gomme o tsebe, ke tlo tloga ke etla. Wa lehlogonolo ke eo a gomarelago ditaba tša porofeta ya puku ye.
8Mokwi le mmoni wa ditaba tše ke nna Johane. Ka re go di kwa le go di bona, ka khunamela fase naong tša morongwa wa go mpontšha dilo tšeo. 9Yena a re: Hle lesa go realo; nna ke mohlanka boka wena, ke etša wene le bana beno ba baporofeta le ba ba gomarelago ditaba tša puku ye. Khunamela Modimo. 10A iša pele a re: Ditaba tša porofeto ya puku ye o se ke wa di boloka wa di tlemelela ka mahuto; gobane lebaka le kgauswi. 11E a senyago, a a iše pele a senye, wa ditšhila a a iše pele go itšhilafatša. Moloki a iše pele go loka; mokgethwa a iše pele go kgethega.
12Tseba gore ke etla ka pela; mme moputso wa ka o tla le nna, moputso wa go tlo bušetša e mongwe le e mongwe ka mo modiro wa gagwe o tlo go ba ka gona. 13Ke nna a le o, nna mathomo le pheletšo, ke nna wa pele le wa bofelo.
14Ba lehlogonolo ke bao ba hlatswago diaparo tša bona, ba ya ka melao ya Gagwe gore e be ba go tlo dumelelwa sehlare sa bophelo, ba tsene motseng woo ka dikgoro. 15Ba go tlo šala ntle ke dimpša, le baloi, le diotswa, le babolai, le ba medimo e šele, le bohle ba go rata maaka le go a dira.
16Nna Jesu ke romile morongwa wa ka, gore a le tsebiše ditaba tše, gore di tsebje diphuthegong. Ke nna modu wa Dafida le moloko wa gagwe; ke nna naledi e phadimago ya meso.
17Gomme Moya le mmeeletšwa ba re: Tlaa!
Le e a kwago a ke a re: Tlaa!
Le e a nyorilwego a a tle a tšee meetse a bophelo a fo fiwa fela.
18Mang le mang e a kwago mantšu a porofeto ya puku ye ke mo tiišetša ke re: Ge motho a ka ekeletša taba tše, Modimo o tlo mo ekeletša dikotlo tše di ngwadilwego fa pukung ye. 19Ge motho a ka tloša mantšu a puku ya porofeto ye, Modimo o tlo mo amoga kabelo ya gagwe ya sehlare sa bophelo, le ya motseng o mokgethwa, le ya tše di ngwadilwego fa pukung ye.
20Yena mohlatsedi wa ditaba tše o re: Go bjalo! Ke tla tloga ke etla!
-- Amene! Tlaa Morena Jesu!
21Kgaugelo ya Jesu Kriste Mong wa rena a e tlele bakgethwa bohle. Amene.
