PSALME ya 57

₁Modimo, ntšhokelwe! Ntšhokelwe, gobane moya wa ka o khuta ka wena. Ke khuta moriting wa diphego tša gago, dikotsi di be di fete.

₂Ke bitša Modimo ya godimodimo; yena Modimo wa go tlo mphethela tšohle.

₃O kua legodimong, mme o roma ba go ntlhakodiša, ba ba ntsogetšego ba sa roga. Modimo o roma botho bja gagwe, le potego ya gagwe.

₄Moya wa ka o lahletšwe gare ga ditau; ke batho ba tukago, ba meno a marumo le mesebe, ba maleme a etšago tšhoša e boelo.

₅Modimo, phagama godimo ga magodimo! Modimo, phagamiša leina la gago godimo ga lefase lohle.

₆Ba reile dinao tša ka ka molaba, moya wa ka wa hloboga. Ba nkepela moreo tseleng, mme gwa tla gwa gohlomela bona.

₇Modimo, pelo ya ka e tiile. Pelo ya ka e tiile; mme ke a opela, ke hlaba sefela.

₈Phafoga, wena moya wa ka! Phafogang, lena bodiletšo le makope! A nke ke tsoše le mahuba!

₉Ke leboge wena Mong a ka ke le gare ga ditšhaba, ke hlabe sefela sa gago ke le gare ga dilete.

₁₀Gobane botho bja gago ke bjo bogolo, bo fihla kua magodimong, potego ya gago e fihla kua marung.

₁₁Modimo, phagama godimo ga magodimo! Modimo, phagamiša leina la gago godimo ga lefase lohle.