PSALME ya 51

₁Modimo, ntšhokelwe, ka gobane o yo botho. Mphumole bosenyi, ka gobane kgaugelo yago ke e kgolo.

₂Napa o ntlhatswe molato, o ntsheketše, ke tšwe dibe.

₃Gobane nna, bosenyi bja ka ke a bo tseba, mme sebe sa ka ga se tloge pele ga ka.

₄Ke senyeditše wena, wena fela; ke dirile sa go go befela; ke gona, o tlo loka, ge o bolela, o tlo rereša ge o ahlola.

₅O a tseba, ke belegwe ke le wa molato; gomme mme o nkamogetše ke le wa dibe.

₆Bjale, ka ge o kgahlwa ke therešo e le mo pelong, o nthute ge thopeng bohlale bjoo.

₇Ako nntšhe dibeng, ke fokelwe ke wena ke sekege; o ntlhatswe ke tage ke fete leswela.

₈O nkwiše tlhalalo le thabo, gore ditho tše o di robagantšego di ipshine.

₉Dibe tša ka o se ke wa hlwa o di bona; makgopo a ka a phumole ka moka.

₁₀Modimo, mpopele pelo e sekilego. Buša o nneele moya wa go tia ka teng ga ka.

₁₁Se nthake pele ga gago; mme o se tloše moyamokgethwa wa gago go nna.

₁₂A nke o bušetše go nna lethabo la mophološwa wa gago; o ntiiše ka moya wa mafolofolo.

₁₃Ke kgone go ruta baarogi tsela tšago; mme badiradibe ba boele go wena.

₁₄Nthole molato wa madi, Modimo, wena Modimo wa go mphološa, gore leme la ka le thabele go loka ga gago.

₁₅Mongaka! Bula molomo wa ka, ke ahlame ke kwatše theto tšago.

₁₆Gobane se se go kgahlago ga se sedimo; ge ke tliša dihlabelo, ga di go thabiše.

₁₇Didimo tše di go kgahlago, ke moya o robegilego; pelo ge e robegile, ge e setlegile, wena Modimo o ka se e nyatše.

₁₈Letla Tsione ka botho bja gago, o age merako ya Jerusalema.

₁₉Ke mo o tlogo thabišwa ke didimo tša go loka, le dihlabelo le dibego; ke mo aletareng ya gago ba tlogo hlaba dipowana.