PSALME ya 43

₁Nkahlolele, Modimo! A ke o nkemele ge ke sekišwa ke batho ba go hloka botho. Nnamolele diatleng tša ba maaka le ba lonya.

₂Gobane, Modimo, sebo sa ka ke wena; o reng o ntahla? Ke reng ke sepedišwa ke hlokoga, ke tshwenywa ke manaba?

₃Roma seetša sa gago le therešo ya gago, ke hlahlwe ke tšona, di nkiše kua thabeng e kgethwa, madulo a gago.

₄Ke batamele aletare ya Modimo, ke tle go Modimo wa go ntlhaladiša lethabong; ke tle ke go leboge ka lekope, wena Modimo o lego Modimo wa ka.

₅Wena moya wa ka! O itlhokofaletšang? O ferehlegelang teng ga ka? Bota Modimo! Ke sa tlo mo leboga ge a mphološitše sefahlego, yena Modimo wa ka.