PSALME ya 28

₁Ke bitša wena Morena o lego lentswe la ka. Se nkhomolele, ke se tlo re ge o nkgerula ka etša ba go fologela moleteng.

₂Theetša, ge ke go hlabošetša lentšu ke go llela, ke go bitša, ke emiša diatla tša ka ke lebile kua thopeng ya Ngwako o mokgethwa wago.

₃O se ntlhothole le bakgopo le badiradibe, bao ba go bua tša leago, mola ba na le bobe pelong.

₄Ba nee tše di lebanego ditiro tša bona le bobe bja mekgwa ya bona, le se ba se dirilego ka diatla; ba bušetše se ba swanetšego.

₅Gobane ga ba hlokomele ditiro tša Morena le tše a di dirago ka diatla tšagwe. -- O tlo ba šwalalanya a se ba agiše.

₆A go retwe Morena; o nkwile ge ke hlaboša lentšu la ka ke lla.

₇Maatla a ka ke Morena, ke yena kotse ya ka. Pelo ya ka e botile yena, mme ka hlakodišwa, pelo ya ka ya goloka, ka mo leboga ka sefela sa ka.

₈Morena ke yena maatla a batho ba gagwe, ke yena sebobophologelo sa motlotšwa wa gagwe.

₉Phološa setšhaba sa gago; šegofatša mohlape wa gago, o o diše, o fele o o kuka go ya go ile.