PSALME ya 18

₁Ke go ratile, Morena, wena maatla a ka.

₂Morena, o lentswe la ka, le sebo sa ka, o monamoledi wa ka. O Modimo wa ka, o thaba ya ka ye ke e botilego, o kotse ya ka, o lenaka la go ntwela, botšhabelo bja ka.

₃Morena Moretwa, ke mmiditše, mme ka namolelwa diatleng tša manaba a ka.

₄Ke be ke rarilwe ke ditlemo tša lehu, ke šetše ke tšhoga dinoka tša kua go se nago maboyo,

₅ke kgokilwe ke dithapo tša bodulabahu, ke kgamilwe ke mahuto a lehu.

₆Ke tlaletšwe ka bitša Morena, yena Modimo wa ka ka mo hlabošetša lentšu, a kwa mokgoši wa ka a le kua Ngwakong wa gagwe; kgoelelo ya ka ya fihla go yena, ditsebeng tša gagwe.

₇Gomme lefase la napa la roromela, la šišinyega, metheo ya dithaba ya kgerega, ya roromela ka gobane a befetšwe.

₈Muši wa thunya o etšwa dinkong tša gagwe, mollo wa tšhuma o etšwa ganong ga gagwe.

₉A sekamiša magodimo a ologa a gata leswiswi ka dinao tša gagwe.

₁₀O rwelwe ke batuki, o a fofa, o akalala ka diphego tša ledimo.

₁₁O bea leswiswi la mo goragora thoko tšohle; leobo la gagwe ke boso bja madiba, maru a go hwarihlana.

₁₂O pharola maru a gagwe ka legadima la gagwe, gwa napa gwa hlaga sefako le dirumula tša mollo.

₁₃Morena o dumiša maru, Yogodimodimo o hlaba mokgoši, o roma sefako le dirumula tša mollo.

₁₄O betša mesebe ya gagwe a ba šwalalanya; o betša dikgadima ba napa ba tšhoga.

₁₅Gwa bonala meela ya mafula, metheo ya lefase ya apoga. Morena, ke tša mohla o befetšwe, ge go šutša ledimo la kgalefo yago.

₁₆A ntšha letsogo a le legodimong, a ntshwara a nntšha meetseng a magolo,

₁₇A nnamolela diatleng tša lenaba la ka le le maatla, diatleng tša bantlhoi ba ba mpaletšego.

₁₈Ba be ba ntsogetše maatla mohla wa madimabe; mme ka thekgwa ke yena Morena.

₁₉A nntšhetša molaleng, a nnamoletše ka gobane ke mo kgahla.

₂₀Morena o ntlhekile, ka gore ga ke na molato; o ntšhetša a bona diatla tša ka di se ne ditšhila.

₂₁Gobane ke be ke swere tsela tša Morena; yena Modimo wa ka ga nka ka mo hlanogela.

₂₂Ke be ke itebanya le ditaelo tšagwe; ga nka ka ikgaoganya le melao yagwe.

₂₃O nkhweditše ke se ne bosodi, ke itota ke šia molato.

₂₄Morena o ntira se se ntshwanetšego ge ke loka, a bone diatla tša ka di se ne ditšhila.

₂₅Yo botho o go hwetša o le yo botho; monna wa go loka o go hwetša o lokile.

₂₆Moleta o go hwetša o le Moleta; mohlanogi o re: Ga o botege.

₂₇Gobane wena o hlakodiša babotlana; O kokobetša mahlo a go ikgodiša.

₂₈Ke wena o tukišago bone la ka; wena Morena Modimo wa ka o ediša leswiswi la ka.

₂₉Ge ke na le wena, nka šwahlela sera sa manaba; ge ke na le Modimo wa ka, nka sela morako.

₃₀Modimo ke yena; tsela ya gagwe ga e na bosodi; Lentšu la Morena ke seetša; ke yena kotse ya bohle ba ba mmotilego.

₃₁Gobane Modimo ke mang, ge e se yena Morena? Ke mang e a lego lentswe, ge e se yena Modimo wa rena?

₃₂Ke yena Modimo montlhamišamaatla, mofatsela ya ka toko.

₃₃O mphile maoto a kome, o nnametša thaba tša ka.

₃₄O ruta diatla tša ka go hlabana; matsogo a ka a nganga bora bja tshipi.

₃₅O ntshwariša kotse ya phološo ya gago, o nthekga ka tsogo la gago le letona, o nkgodišitše ka boleta bja gago.

₃₆O thuletše dinao tša ka tsela; dikokoilane tša ka ga tša thekesela,

₃₇Ka raka manaba ka ba ka a swara; ga ke gome ke sešo ka a feleletša.

₃₈Ke a pšhatlaganya a se hlwe a kgona go ka tsoga, ka a gata ka dinao tša ka.

₃₉O ntlhama ka maatla a ntwa; bantsogedi o ba kokobetša tlase ga ka.

₄₀Ke wena, ge manaba a ka a nneela dietse, ka fediša ba ba ntlhoilego.

₄₁Ba hlaba mokgoši, ba hloka monamodi; ba bitša Morena, a se ba arabe.

₄₂Ka ba šilakanya ba etša leroleletšewakephefo; ka ba gatakanya ba etša seretse mokgolokgotheng.

₄₃O nnamoletše mohla wa moferefere wa setšhaba; O mpeile mmuši wa bantle.

₄₄Ba nkutlwela ruri ka ditsebe tše di kwago; ke lotšhwa ke batho ba mathoko.

₄₅Ba mathoko ba nolega moko; ba roromela ba etšwa dibong tša bona.

₄₆Morena o gona, Moretwa ke yena lentswe la ka; Yogodimodimo ke yena Modimo wa go mphološa.

₄₇Yena Modimo wa go mpea ka lefetša; a mpea ka buša ditšhaba.

₄₈O nnamoletše mohla manaba a ka a befetšwe, a nkgodiša gara ba ba ntsogetšego; a ntlhakodiša diatleng tša monna e mošoro.

₄₉Ke tšona tseo ke go lebogago tšona ke le gare ga ditšhaba; wena Morena, ke tlotla leina la gago,

₅₀Wena Modiratšekgolo o phološa kgoši ye o e beilego; o dira motlotšwa wa gago ka botho, Dafida leloko la gagwe go ya go ile.