PSALME ya 140

₁Morena, nnamolele mo bathong ba babe, o nkefoše banna ba bašoro.

₂Ke ba akanyago bobe dipelong, ba go tsoša dintwa ka mehla.

₃Ba lootša maleme a bona bjalo ka dinoga, mo ganong ga bona go bohloko bja mokopa.

₄Morena, mphemele atla tša bakgopo, o nnamolele diatleng tša banna ba bašoro, ba rego ba mphereketše dinao tša ka.

₅Baikgogomoši ba ntheile ka melaba le ka manti, ba ngangile dithapo tša malokwa, ba nkepetše moreo tseleng.

₆Mme nna ka re: Morena, o Modimo wa ka; ntshekegele tsebe ge ke hlaboša lentšu mme ke go llela.

₇Morena Mong wa ka, yo maatla a go mphološa, o mphemela hlogo ya ka mohla wa tlhabano.

₈Morena, yo kgopo o se ke wa mo nea se a se kganyogago, maano a gagwe a a se letlege; a se tlo ikgogomoša.

₉Dihlogo tša ba ntikago a di welwe ke bjona bošula bjoo ba bo boletšego.

₁₀A ba ribegetšwe ke magala a hlennego, a ba digelwe mollong, mekoting, ba se hlwe ba tsoga.

₁₁Moradia a ka se letlegelwe mo faseng; monna yo šoro, bobe bo tlo mo hlomarela, a be a ušetšwe ruri.

₁₂Nna ke tseba gobane Morena o emela babotlana, o ahlolela badiitšana.

₁₃Go bjalo, baloki ba tlo leboga leina la gago; ba ba se nago bosodi ba tlo fela ba dutše pele ga gago.