PSALME ya 138
Sefela sa go leboga
Sa Dafida.
1Ke go leboga ka pelo ka moka; ke hlaba sefela sa gago pele ga medimo.
2Ke khunama ke lebile Ntlokgethwa ya gago; ke leboga leina la gago botho le potego; gobane leina la gago o le godišitše la fetiša tšohle, la fetiša le tše o di boletšego.
3O nkwile ge ke go bitša, wa mpha mafolofolo, maatla moyeng wa ka.
4Morena, o tlo lebogwa ke dikgoši tšohle tša lefase ge di kwa polelo ya molomo waago,
5Gwa tlo hlabja sefela sa tsela tša gago, Morena gwa tlo thwe: Letago la Morena ke le legolo!
6Gwa tlo thwe: Morena ke yo mogologolo, mme o bona babotlana; le wa go iphagamiša o mo tseba ka kgole.
7Le ge ke sepela mo gare ga mathata, o a mphediša; seatla sa gago se tlo mphemela dikgalefo tša manaba a ka; O tlo mphološa ka letsogo la gago le letona.
8Morena o tlo mphethela ditaba tša ka. Morena, botho bja gago ke bja mehla ya neng le neng. Hle se lahle modiro wa diatla tša gago.
© Bible Society of South Africa 1986. Used with permission. All rights reserved.
