PSALME ya 132

₁Morena gopola Dafida le mehlako ya gagwe ka moka.

₂Ke yena wa go enela Morena, a itlema a bolela le Mogale wa Jakobo, a re:

₃Nka se ke ka tsena ngwakong wa ka; nka se ke ka yo lala malaong a ka,

₄Mahlo a ka ke tlo a tima boroko, ka tima dintšhi tša ka go otsela,

₅Go fihla ge ke hweleditše Morena felo ga moago wa Mogale wa Jakobo.

₆Ka kgonthe re di kwile Efurata, re di hwetša kua nageng ya hlaga, ge go thwe:

₇A re yeng Ngwakong wa gagwe, re khuname bogatong bja dinao tšaagwe!

₈Morena, nanoga, o tle makhutšong a gago, wena le Polokelo ya maatla a gago.

₉Baperisita ba gago a ba apare toko, bagaugelwa ba gago ba hlalale.

₁₀O se gane sefahlego sa motlotšwa waago ka lebaka la Dafida mohlanka wa gago.

₁₁Morena o enetše Dafida ka go rereša, mme a ka se hlanoge, ge a itše: Mo sedulong sa bogoši bjaago ke tlo dudiša wa kenyo ya mmele wa gago.

₁₂Ge bana ba gago ba botegela kgwerano ya ka le mabohlatse a ka a ke ba rutago ona, gona le barwa ba bona ba tlo dula sedulong sa gago go ya go ile.

₁₃Gobane Morena o itlhaoletše motse wa Tsione; o ratile gore e be bodulo bja gagwe, a re:

₁₄Felo fa ke ga makhutšo a ka neng le neng; ke tlo dula fa ka gobane ke go ratile.

₁₅Felo fa ke tlo go šegofatša ruri ka mohora, ka horiša badiidi ba gona ka dijo.

₁₆Baperisita ba ntshe ke tlo ba apeša ka phološo, bagaugelwa ba gona ba tlo goba megobo.

₁₇Ke gona mo ke tlogo medišetša Dafida lenaka; yena motlotšwa wa ka ka mmeela lebone.

₁₈Manaba a gagwe ke tlo a apeša dihlong; mme go yena go tlo phadima mphapahlogo wa gagwe.