Lebogang Morena yo botho bja neng le neng
1Lebogang Morena, gobane ke yo bolo; mme botho bja gagwe ke bja neng le neng.
2Baisiraele a ba ke ba re: Botho bja gagwe ke bja neng le neng!
3Ba leloko la Arone a ba ke ba re: Botho bja gagwe ke bja neng le neng!
4Ba go boifa Morena a ba ke ba re: Botho bja gagwe ke bja neng le neng!
5Morena, mola ke le tlalelong, ka mmitša mme a nkwa, a ntšweletša molaleng, yena Morena.
6Morena o na le nna; ga ke boife selo; batho ba ka ntirang?
7Morena o na le nna; o a nthuša; ke tlo bona se se tlogo dirwa ba ba ntlhoilego.
8Go khuta ka Morena ke gabotse, go phala ge o bota batho.
9Go khuta ka Morena ke gabotse, go phala go bota babuši.
10Ke be ke dikilwe ke bantle bohle; mme ka leina la Morena ka ba šwalalanya.
11Ba be ba ntikile ba ntietše gare: mme ka leina la Morena ka ba šwalalanya.
12Ba be ba mpoka boka dinose, ba tuka boka mollo madigeng; mme ka leina la Morena ka ba šwalalanya.
13Ba be ba nkgorometša ruri, ba re ke we, mme ka emelwa ke Morena.
14Maatla a ka ke Morena, ke yena sefela sa ka; ke yena Mophološi wa ka.
15Malapeng a ba ba lokilego go kwala mantšu a tlhalalo ya ba phološitšwego. Letsogo la Morena le letona le dira ditiro tše maatla.
16Letsogo la Morena le letona le a phagamiša. Letsogo la Morena le letona le dira ditiro tše maatla.
17Nka se ke ka hwa, ke tlo phela ka bolela ditiro tša Morena.
18Go sola, Morena o ntshotše; fela, ga a ka a nkgafela lehung.
19Mpuleleng dikgoro tša toko, ke tsene ke leboge Morena.
20Kgoro ya Morena še; ka yona go tsena ba ba lokilego.
21Ke a go leboga, gobane o nkwile, wa ba Mophološi wa ka.
22Leswika le baagi ba le nyaditšego le bile la motheo wa sekhutlo.
23Tše bjalo ge di direga, di tšwa go Morena; re bona e le matete.
24Ke lona letšatši le Morena a le dirilego; a re hlalaleng re thabe ka lona.
25Hle Morena, a ke o re phološe! Hle Morena, a ke o re šegofatše!
26A go šegofatšwe e a tlago ka leina la Morena; re le šegofatša re le mo Ngwakong wa Morena.
27Modimo ke yena Morena; o re fa seetša; tlemang dibego tša monyanya ka dithala, le di iše dinakeng tša aletare.
28Modimo wa ka ke wena. Ke a go leboga wena Modimo wa ka. Ke tlo go godiša.
29Lebogang Morena, gobane ke yo bolo; mme botho bja gagwe ke bja neng le neng.
