Reta Morena Mogaugedi
Sa Dafida.
1Moya wa ka, reta Morena! Tšohle tša teng ga ka a di rete leina lagwe le lekgethwa.
2Moya wa ka, reta Morena! O se lebale tše dibotse tše a go diretšego tšohle,
3a go lebalela melato ya gago yohle; a go fodiša malwetši a gago ka moka,
4a hlakodiša bophelo bjago moleteng, a go apeša botho le dikgaugelo.
5O go horiša tše dibotse ge o tšofala; wa bušetšwa bosogana boka nong.
6Modirakagoloka le molao ke Morena, ge a ahlolela ba ba hlakišwago.
7Ditsela tša gagwe o di tsebišitše Moshe; Baisiraele o ba tsebiša tiro tša gagwe.
8Morena ke mogaugedi, ke wa mabobo, ke mosefelepelo wa botho bjo bogolo.
9A ka se lwe ka mehla, a ka se dule a befetšwe go ya go ile.
10Se a re dirago sona ga se go latiša bokgopo, ga se go lefeletša sebe.
11Ruri, botho bja gagwe bo etša legodimo, le le tletlolo ga lefase; bo tiile bo ukama ba ba mmoifago.
12Dikarogo tša rena o di tloša mo go rena a di iša kgole, kgole boka bohlabela bo le kgole le bodikela.
13Morena o šokelwa ba ba mmoifago bjalo ka tatagobana ge a gaugela bana ba gagwe.
14Gobane yena o tseba lebopo le re lego ka lona, ga a lebale ge re le lerole.
15Matšatši a motho a bjalo ka bjang; a etša letšoba la naga ge le tagile.
16Ge phefo e le feta ka godimo, le se hlwe le eba gona, mme felo ga lona go se hlwe go le tseba.
17Mme botho bja Morena bo gona bo se na mathomo le mafelo; bo ukametše ba ba mmoifago; go loka ga gagwe go gona go bana le bana ba bana;
18go lebane le ba ba dulago e le ba kgwerano yagwe, ba ba sa lebalego melao ya gagwe, ba dira ka yona.
19Morena, sedulo sa gagwe o se theile kua magodimong; mme mmušo wa gagwe o buša tše go fela.
20Retang Morena, lena barongwa ba gagwe, lena bagale ba maatla ba go dira ka lentšu la gagwe, ba go theetša se a se bolelago.
21Retang Morena, lena madira a gagwe ohle, lena bahlanka ba gagwe ba go dira tše di mo kgahlago.
22Retang Morena, lena dibopša tša gagwe ka moka, tše di lego mo go fela mmušong wa gagwe. Moya wa ka, reta Morena.
