PSALME ya 10

₁Morena, o reng o ema kgole? O reng o sa tšwelele mohla wa tlalelo?

₂Mmotlana o swa ka boikgodišo bja babe. A ba tanywe ke maano ba go a loga.

₃Ba babe ba opela koša ya dikganyogo tša bona; ba megabaru ba a itheta, ba nyatša Modimo.

₄Ba babe ba šatalala ba re: Ga go Molefetši! Ga go ne Modimo! Ba realo, ke moka.

₅Ba letlwa ke ditsela mehla yohle; kahlolo tša gago di godimo, ga ba di bone; ba getla ba ba lwago nabo.

₆Mobe mo pelong ya gagwe o re: Nka se šuthe fa! Ke wa go se welwe ke bošula neng le neng!

₇Molomo wa gagwe o tletše maroga, le bofora le ditshele; leleme la gagwe le ne leswenya le lonya.

₈O dula a laletše metsaneng; a le sekhung o bolaya motho a se nago taba; mahlo a gagwe a tsoma molahlegi.

₉O boba boka tau mo hlageng; o laletše sešuana gore a se sware. Mme o swara sešuana a se goga ka lokwa la gagwe.

₁₀O a khukhuna a batalala; mme motho wa batho o swarwa ka dinala.

₁₁Ka pelong ya gagwe o re: Modimo o lebetše; o širilwe sefahlego; ga a ke a bona selo.

₁₂Morena, nanoga, o emiše letsogo; se lebale sešuana.

₁₃A yo mobe o tlo fela a go nyatša, wena Modimo, a re: Ga o latišiše?

₁₄Aowaa, o di bone, mabošula le masetlapelo o a ela hloko, gore seatla sa gago se tle se dire. Ba ba lapilego ba šetše e le ba gago, Molweladišuana.

₁₅Roba mosenyi letsogo; e mobe latišišiša makgopo a gagwe, gore a se hlwe a bonwa.

₁₆Kgoši ke yena Morena ka mehla le mehla le neng le neng; bantle ba a fela mo nageng ya gagwe.

₁₇Morena, dipelaelo tša bahlaki o di kwile; O ba bea pelo o ba sekegetše tsebe.

₁₈Gore o namolele dišuana le bahlaki; motho wa lefase a se hlwe a tšhoša batho.