DIEMA 9

₁Bohlale bo agile ntlo ya bjona; bo betlile kokwane tša bjona tše di šupago. ₂Bo hlabile dihlabja tša bjona, bja fotla morara wa bjona, bja sola ditshola tša bjona. ₃Bja roma dimatlane, tša laletša batho di le diokamong, tša re: ₄Yo e lego wa lešilo, a a fapogele mono! Bahlokatlhaloganyo ba thwe: ₅Tlang le jeng bogobe bja ka, le nweng morara wo ke o fotlilego. ₆Lahlang bošilo le phele, le tšee ka tsela ya tsebo.

₇Mokgalamokweri o oba mašapa, mosolasehlola o oba dihlong. ₈Mokweri se mo kgale, a se tlo go hloya; o kgale yo bohlale, a tle a go rate. ₉Ruta yo bohlale a tšwelele pele bohlaleng. Ruta moloki a ekeletšwe tsebo.

₁₀Mathomo a bohlale ke go boifa Morena; tlhaloganyo ke go tseba Yena Mokgethwa. ₁₁Gobane ka nna o tlo atelwa ke matšatši, wa okeletšwa nywaga ya go phela. ₁₂Ge o hlalefa, o itshetša; ge o le mokweri, o rwala molato o nnoši.

₁₃Mosadi wa setlatla o na le mašata; ke lešilo, ga a tsebe selo. ₁₄O dula mojako wa ngwako wa gagwe, e ke ke madulo a bogoši mo motseng. ₁₅O bitša bafeti ba tsela, ba ba swerego tsela ya go loka. ₁₆Yo lešilo, a a fapogele moo; a se nago mogopolo, a a mo kwe a re: ₁₇Go tsefa meetse a bohodu; selewathopeng se a natefa. ₁₈Go tlo ya e a sa tsebego ge moo go na le ba ba hwilego, ge malalediwa agwe a le sekoting sa bahu.