DIEMA 7

₁Ngwanaka! Boloka mantšu a ka; o dule o beile ditaelo tšaka ka pelong ya gago. ₂Boloka ditaelo tšaka, o tle o phele. Lota thuto yaka boka thaka ya leihlo lago. ₃O di tlemelele menwaneng ya gago; o di tloke mo pelong ya gago. ₄O re: Bohlale, o kgaetšedi ya ka! O re: Tlhaloganyo, o motswalo wešo! ₅O tle o efoge mosadi yola o šele e sego wago, wa dipolelo tša go thelela.

₆Nkile ka okama ka lešoba la ntlo yaka, ka nthoba ya lefao; ₇ka bona ditlatla; mo go masogana ka lemoga le lengwe la lešilo. ₈Le hlehla ka mekgoba, le rarela le tšea ka tsela ya go feta ka lapeng la mosadi yola. ₉E be e le ka lesothwana, mantšibua, lefsifsi la bošego ge le swara. ₁₀Mosadi yola šo! O a mo hlakanetša; aparo ke tša seotswa, pelo ke ya bomenetša. ₁₁Pelo ya gagwe e beloga ka kganyogo; ga a tsebe go iketla le go dula ka lapeng. ₁₂So mekgotheng! Soo kgorong! O hlola mo go fela dikhutlong. ₁₃Soee! O swere lsogana lela, o a le atla, o bolela a se ne dihlong, o re: ₁₄Ke be ke sa le wa go ntšha didimo; lehono gona ke phethile keno tšaka; ₁₅ka tšwa ke gahlanetša wena; ke lla bonana nago; bjale gomme ke go hweditše. ₁₆Malao aka ke a aletše mašela a mabotse, le kobo ya mebalabala ya leokodi la Egipita. ₁₇Marobalo aka ke foketše ka dihlare le ka diorelo. ₁₈Tlaa re yo thabišana ka lerato go be go se, re yo ipshina ka go ratana. ₁₉Monna waka ga a gae; o etile, o ile kgole. ₂₀O sepetše le sekhwama sa tšhelete; mo gae o tlo boa mohla kgwedi e tlala. ₂₁A mo goketša ka polelo tše di ntši, a ba a mo kgona ka leme la gagwe la boreledi. ₂₂Lesogana la mo šala nthago, boka pholo e išwe tlhabong, bjalo ka lešilo ge le tlemilwe go yo otlwa. ₂₃A yo hlabya pelo ka mosebe; a etša nonyana ge kganyelela sefung e sa tsebe ge e le go yo hwela gona.

₂₄Bjalo ge, lena bana ba ka! Kwang nna, le theetšeng dipolelo tša molomo wa ka. ₂₅O se dumelele pelo yago go fapogela ditseleng tša mosadi eo, o se tlo timela o latetše nao tšagwe. ₂₆Gobane ke bantši ba a ba hlabilego a ba uša; o bolaile le ba matla ba bantši. ₂₇Ngwako wa gagwe ke wa tsela di išago tahlegong, tša go fologela phapošing tša lehu.