Diema tša Aguri
1Moeno wa Aguri morwa wa Jake wa gaMasa. Monna eo o re: Ke phegella Modimo! Ke phegella Modimo! Mme o a ntšhita. 2Ruri, ke šetše ke le sesoswana, ga ke motho; ga ke sa na tlhaologanyo ya motho. 3Bo mpaletše, bohlale bja go ka fihlela go mo tseba, Yena Mokgethwa. 4Kwa magodimong go rotogetše mang a bowa? Ke mang a kago khuparetša phefo ka diatla? Mawatle, ke mang a kago a phuthela mo kobong? Ke mang a beilego morumo wa lefase? -- Leina la gagwe ke mang? -- Le morwa wa gagwe, leina la gagwe ke mang? -- Ge o ka di tseba!
5Mantšu ohle a Modimo ga a na selabi. Ke yena kotse ya bohle ba mmotago. 6Mantšu a gagwe o se a eketše ka a gago, a se tlo go hwetša o le moaketši, a go otla.
7Ke tše pedi tše ke go kgopelago tšona; se nkgane natšo ke sešo ka hwa. 8Tša lefela le maaka a di ntloge kgole. Se nnee bodiidi, se nnee lehumo. Mphephe ka bogobe byo bo ntekanego. 9E se re ge ke khoše ka hlanoga, ka re: Morena ka mang? Goba ke hloka, ka utswa, ka senya ina la Modimo wa ka.
10Se bege molata go mong wa gagwe a se tlo go roga, molato e le wa gago.
11Go na le mohuta morogatatao, o sa šegofatšego mmao.
12Ke mohuta o rego: Rena re ila bosodi, etšwe o sa hlapa thšila.
13Ke mohuta wa go phagamiša mahlo, wa ditebalebo tša go ikgodiša.
14Ke mohuta wa meno a marumo, wa mehlagare ya mefaka, wa go ja babotlana gore ba fele faseng, gore badiidi ba fele bathong.
15Kgofa e na le bana babedi; ke Mphe le Mphe. Go na le tše tharo tše di sa khorego, le tše nne tše di sa kego di bile di re: Go lekane!
16Ke boyabahu, ke tswala ya moopa, ke naga ye e sa horego meetse, ke mollo o sa kego o bile o re: Go lekane!
17Ihlo lekweratatalo, la gana go kwa mmalo, le tlo gonywa ke magukubu nokeng, le tlo lewa ke mafoto a manong.
18Go na le tše tharo di ntlabago; ke tše nne tše ntšhtago: 19Ke tsela ya nong sebakeng; ke tsela ya noga lwaleng; ke tsela ya leselawatle lewatleng; ke tsela ya monna monyakamosadi.
20Mokgwa wa mosadi wa nonyana šo: O a ja, a phomola melomo, a re: Ga ka dira sebe!
21Naga e ka šišinyega ka tše tharo; go na le tše nne di e palelago: 22Ke mohlanka ge a buša; ke setlatla ge se hoše, 23ke mosadi mohloegi a eba mohumagadi; ke molata wa mosetsa a eja bohwa bja mohumagadi wagwe.
24Go na le tše nne, tše e lego tše nyenyane lefaseng, mme go hlalefile tšona: 25Ke mohlwa, setšhaba sa go fokola; mme se ipolokela sejo lehlabula. 26Ke dipela, setšhaba sa go hloka matla; se ikagetše nywako mafsikeng. 27Ke tšie, e se nago kgoši, mme ka moka e tsoga ka dihlophahlopha. 28Ke mokgaditswane, o swara ka diatlana; le mo nywakong ya mošate o gona.
29Go na le tše tharo, ditswatswa ge di sepela; ke tše nne tše tsoro ge di šataka. 30Ke tau, mogale dibateng ga e na se e se thšabago. 31Ke moitlemamatheka, le ge e le phoko, le kgoši ye e sa fenywego. 32Ge o dirile tša bošilo ka go ikgodiša goba ka boomo, bea seatla molomong.
33Gobane go fehla lebebe go ntšha makhura; go pitla dinko go ntšha mookola; go hlohla bogale go tsoša tlhabano.
