DIEMA 28

₁Ba babe ba tšhaba, go se e a ba rakago; baloki ba iketla boka tau ya ledumaedi.

₂Naga e senyega ka tlhanogo ge bogoši bo bakiwa; e lala galelele go na le ba tlhaloganyo le ba tsebo.

₃Mmuši mohlakišababotlana, ke pulakgogola e se nago dijo.

₄Bahlalamolao ba reta disenyi; balotodi ba molao ba lwa nabo.

₅Batho babe ga ba hlathe toko; ba ba nyakago Morena ba lemoga tšohle.

₆Modiidi ge a swere tsela ya go loka, o phala mohumi wa go kgopamiša tsela.

₇Ngwana wa tlhaloganyo o lota molao; mohlwaleditagwa o leša tatagwe dihlong.

₈Wa go ikhumiša ka kadimo ya go ja ba bangwe, o kgobelela eo wa go tlo setša babotlana.

₉Tlhalamolao, le thapelo yagwe ke makgapa.

₁₀E a gokelago ya bolo ditseleng tša bobe, moreong wa gagwe go tlo wela yena.

Bailabosodi ba ja lefa le le botse.

₁₁Monna wa mohumi o re: Ke mohlale! O hlathwa ke mmotlana wa tlhaologanyo.

₁₂Mohla go hlalala ba baloki, ke ge bokwala bo godile; ge go tsogile ba babe, batho ba a utama.

₁₃Mmipadikarogotšagwe ga a letlege; go tlo gaugelwa e a ipegago mme a lahla dikarogo.

₁₄Wa lehlogonolo ke mohlwaaboifa; moithatafišapelo o tlo wela bošuleng.

₁₅Mmuši e mobe, ge a buša babotlana, ke tau e bopago, ke sebata se se bolayago.

₁₆Mokgomamohlokakelello o bata go hlakiša batho; moilamegabaru o tlo phela galelele.

₁₇Motho wa moetlo wa madi, o tlo tšhaba go fihla lebitleng; se mo thibeleng.

₁₈Moswaratselayagoloka o tlo phologa; madikadike wa tselapedi, o tlo wa go e nngwe.

₁₉Moitemelatšhemo o tlo ja bogobe; molatamafela o tlo khora tšhego.

₂₀Monnammotegi o tlo huma tšhegofatšo; mothakanelakhumo molato ga a o hloke.

₂₁Go emelela motho sepitša ga go botse; le wa go rekwa ka thatana ya bogobe o gona.

₂₂Motho wa ihlo la megabaru o kganyelela go huma; ga a tsebe ge a tlo tlelwa ke bohloki.

₂₃Mosolabatho o tlo ba a ratwa, gwa nyatšega wa leme la boreledi.

₂₄Mohlakolatatagwelemmagwe, a re: Ga se sebe, ke wa gabosehlola.

₂₅Wa megabaru o tsoša ntwa; e a tlo go khora ke e a botago Morena.

₂₆Moipoti ke setlatla; go phonyokga e a yago ka bohlale.

₂₇Tlhallabadiidi a ka se ke a ba a hloka; moitšhiramahlo o tlo kwa mašapa a mantši.

₂₈Mohla go tsogile ba babe, batho ba a utama; ge ba babe ba senyega, baloki ba a ata.