DIEMA 27

₁Se fadiše tša ka moso; le tša lehono ga o di tsebe.

₂Homola o retwe ke bangwe; ke tša ba bangwe tšeo, ga se tša molomo wago.

₃Lefsika le boima; le lešabašaba ke morwalo; tše pedi tšeo di fetwa ke tsheleko ya lešilo.

₄Bogale ke bjo šoro, sekgoro se a hlohla; lehufa lona le kgonwa ke mang?

₅Tsholokgakala e phala leratoleutwa.

₆Kgati ya monthati e a botega; ke golelwa ke dikatlo tša montlhoi.

₇Motho a hoše, o gata nose ka maoto; wa tlala le tše galakago di mo kwiša bose.

₈Morakwagae ke nonyana ye e rakilwego sehlageng.

₉Ditlolo le diorelo di thabiša pelo; le keletšo e tšwago pelong ya mogwera e bose.

₁₀Mogwera wa gago, le wa tatago, o se ba hlale. Ge mohlamobe o sa fihle ga ngwaneno, moagišani wa kgaufsi o phala ngwaneno wa kgole.

₁₁Ngwanaka! Hlalefa, o nthabiše pelo, ke tsebe se nkago fetola sona ge ba nnyatša.

₁₂Mohlale o bona dikotsi di setla, a khuta: ba mašilo ba a feta ba yo hlaka.

₁₃Mo amoge kobo; o humetše mosetsebje; mo swarelele ka baka la o šele.

₁₄Motsogakameso, a tsoša wa gabo ka ntšu le legolo, ba tlo re o a mo roga.

₁₅Tlhaka e nethago ka medupi, le mosadi wa senganga, di a swana. ₁₆E a rego: Nka mo fepeletša, o fepeletša phefo, o re: Makhura nka a khuparela ka seatla!

₁₇Tshipi e kgaritša thipi; le mahlo a batho a a kgaritšana.

₁₈Moletamogo wa gabo o tlo ja mago; moletamongwagagwe o tlo huma.

₁₉Sefahlogo se ipona ka meetseng; pelo ya motho e ipona ka ya e mong.

₂₀Mahlo a motho go se hore, a swana le bodulabahu le sekoti sa tshenyego.

₂₁Tshipi e lekwa ka mollo meubeng; monna o lekwa ka melomo ya ba mo retago.

₂₂Lešilo ge o ka le setla le mabele lehudung, le ka se kgoboge bošilo.

₂₃Tsenya nku tšago mahlo, o di tsebeše: O lote mohlape wa gago. ₂₄Gobane leruo ga se la neng le neng, le bogoši ga se bja meloko le meloko. ₂₅Ge mabyang a fsile, go tlo hloga a manana, merogo e tla giwa dithabeng. ₂₆Dinku di go nea kobo, wa reka tšhemo ka diphoko. ₂₇Pudi di go nea mafsi a go šeba, dijo tše di lekanago ba lapeng la gago, tša go phediša le balata bago.